തിരുവനന്തപുരം : ബംഗാള് ഉള്ക്കടലില് രൂപം കൊണ്ട ബുറെവി ചുഴലിക്കാറ്റിന്റെ പശ്ചാത്തലത്തില് തെക്കന് കേരളം – തെക്കന് തമിഴ്നാട് തീരങ്ങള്ക്ക് കേന്ദ്ര കാലാവസ്ഥ വകുപ്പ് ചുഴലിക്കാറ്റ് മുന്നറിയിപ്പ്- റെഡ് അലര്ട്ട് പ്രഖ്യാപിച്ചു. ചുഴലിക്കാറ്റിനെ നേരിടാനുള്ള മുന്നൊരുക്കങ്ങള് വിലയിരുത്താന് മുഖ്യമന്ത്രി പിണറായി വിജയന് ഉന്നതല യോഗം വിളിച്ചു. 3.30- ന് സെക്രട്ടേറിയറ്റിലാണ് വിവിധ വകുപ്പുകളുടെ യോഗം ചേരുന്നത്.
അപകടസാദ്ധ്യതാ മേഖലകളില് താമസിക്കുന്നവരെ മാറ്റി പാര്പ്പിക്കുന്നതിനായി തലസ്ഥാനത്ത് 217 ക്യാമ്പുകള് തുറന്നിട്ടുണ്ട്. 15,840 പേരെ ക്യാമ്പുകളിലേക്ക് മാറ്റി. തിരുവനന്തപുരം താലൂക്ക് പരിധിയില് 107 ക്യാമ്പുകളുണ്ട്. ചിറയിന്കീഴ് 33, വര്ക്കല 16, നെയ്യാറ്റിന്കര 20, കാട്ടാക്കട 12, നെടുമങ്ങാട് 29 എന്നിങ്ങനെയാണ് ക്യാമ്പുകളുടെ എണ്ണം.
തെക്ക് കിഴക്കന് ബംഗാള് ഉള്ക്കടലില് രൂപം കൊണ്ട ബുറെവി ചുഴലിക്കാറ്റ് ശ്രീലങ്കന് തീരം തൊട്ടു. കഴിഞ്ഞ 6 മണിക്കൂറായി മണിക്കൂറില് 11 കിമീ വേഗത്തില് പടിഞ്ഞാറ് ദിശയില് സഞ്ചരിച്ച് ഒടുവില് വിവരം ലഭിക്കുമ്പോള് 9.1° N അക്ഷാംശത്തിലും 80.2°E രേഖാംശത്തിലും എത്തിയിട്ടുണ്ട്.
ഇത് മാന്നാറില് നിന്ന് 30 കിമീ ദൂരത്തിലും പാമ്പനില് നിന്ന് 110 കിമീ ദൂരത്തിലും കന്യാകുമാരിയില് നിന്ന് ഏകദേശം 310 കിമീ ദൂരത്തിലുമാണ്. അടുത്ത 3 മണിക്കൂറില് ചുഴലിക്കാറ്റ് ഗള്ഫ് ഓഫ് മാന്നാറില് എത്തുമെന്നാണ് പ്രതീക്ഷിക്കുന്നത്.
