പത്തനംതിട്ട: കണ്ണൂര് എ.ഡി.എം ആയിരിക്കെ മരണപ്പെട്ട നവീന് ബാബുവിന്റെ മകള്ക്ക് സര്ക്കാര് സര്വീസില് ജോലി ലഭിച്ചു. മകള് നിരഞ്ജന എന്. നായര്ക്കാണ് ജോലി ലഭിച്ചത്. ആശ്രിത നിയമന വിഭാഗത്തിലാണ് ഭക്ഷ്യ സുരക്ഷാ വകുപ്പില് ഭക്ഷ്യ സുരക്ഷാ ഓഫീസറായി നിയമിച്ച് ഉത്തരവായത്. ഏത് ജില്ലയിലെ ഓഫീസിലാണ് ജോലിയില് പ്രവേശിക്കുക എന്നത് സംസ്ഥാന ഭക്ഷ്യ സുരക്ഷാ കമ്മീഷണറുടെ ഉത്തരവിന്റെ അടിസ്ഥാനത്തിലാവും തീരുമാനിക്കുക. ബി.ടെക് ഫുഡ് ടെക്നോളജി ബിരുദധാരിയാണ് നിരഞ്ജന.
കണ്ണൂര് എ.ഡി.എം ആയിരുന്ന നവീന് ബാബുവിനെ 2024 ഒക്ടോബര് 15ന് കണ്ണൂരിലെ ഔദ്യോഗിക വസതിയില് മരിച്ച നിലയില് കണ്ടെത്തുകയായിരുന്നു. പത്തനംതിട്ടയിലേക്ക് സ്ഥലം മാറ്റം ലഭിച്ച ശേഷം ഒക്ടോബര് 14 ന് കണ്ണൂര് കളക്ട്രേറ്റില് നടന്ന യാത്രയയപ്പ് യോഗത്തിന് ശേഷമാണ് നവീന് ബാബുവിനെ മരണപ്പെട്ട നിലയില് കണ്ടെത്തിയത്. അന്നത്തെ കണ്ണൂര് ജില്ലാ പഞ്ചായത്ത് പ്രസിഡന്റ് പി.പി ദിവ്യ യാത്രയയപ്പ് യോഗത്തില് ക്ഷണിക്കാതെ എത്തുകയും പെട്രോള് പമ്പുമായി ബന്ധപ്പെട്ട് നവീന് ബാബുവിന് എതിരെ ഗുരുതരമായ അഴിമതി ആരോപണങ്ങള് ഉന്നയിക്കുകയും ചെയ്തിരുന്നു. ഈ അപമാനത്തില് മനം നൊന്താണ് അദ്ദേഹം ആതമഹത്യ ചെയ്തത് എന്നും ആരോപണമുയര്ന്നിരുന്നു. തുടര്ന്ന് ഈ കേസ് പോലീസില് നിന്നും സി.ബി.ഐ ക്ക് കൈമാറുകയും ചെയ്തിരുന്നു.
