പത്തനംതിട്ട : ജില്ലയിലെ സഹകരണ മേഖല വെട്ടിപ്പിടിച്ച് ഭരിക്കുന്ന സി.പി.എമ്മിന് തിരിച്ചടിയായി ഇപ്പോള് തിരുവല്ല അര്ബ്ബന് സഹകരണ ബാങ്ക് കടുത്ത നിയന്ത്രണത്തിലേക്ക് റിസര്വ് ബാങ്ക് കൊണ്ടുവന്നിരിക്കുകയാണ്. സി.പി.എം ഭരിക്കുന്ന കല്ലൂപ്പാറ പഞ്ചായത്തിലെ ചെങ്ങരൂര് സര്വ്വീസ് സഹകരണ സൊസൈറ്റിയും തകര്ച്ചയിലേക്ക് പോകുകയാണ്.
അടൂര് അര്ബന് ബാങ്കിന്റെ തകര്ച്ചക്ക് ശേഷം ഇപ്പോള് സി.പി.എം ഭരിക്കുന്ന തിരുവല്ല അര്ബന് ബാങ്കും കെടുകാര്യസ്ഥതമൂലം തകര്ച്ചയിലെത്തിയിരിക്കുന്നു. തിരുവല്ല അര്ബന് ബാങ്കില് നിക്ഷേപം സ്വീകരിക്കുവാനോ സ്വര്ണ്ണപ്പണയമുള്പ്പെടെ ഒരു വായപ്പപോലും നല്കുവാനോ കഴിയാത്ത തരത്തില് റിസര്വ് ബാങ്ക് ഓഫ് ഇന്ത്യ നിയന്ത്രണം ഏര്പ്പെടുത്തിയിരിക്കുകയാണ്.
വായ്പക്കാരുടെ പേരിലുള്ള ഷെയര് തുകപേലും തിരികെ നല്കുവാന് സാധിക്കുന്നില്ല. സി.പി.എം ഭരിക്കുന്ന കല്ലൂപ്പാറ പഞ്ചായത്തിലെ ചെങ്ങരൂര് സര്വ്വീസ് സഹകരണ സെസൈറ്റി പൂര്ണ്ണമായും തകര്ച്ചയിലാണ്. നിക്ഷേപകരുടെ തുക തിരികെ നല്കുന്നില്ല. അംഗങ്ങള്ക്ക് വായ്പയും നല്കുന്നുമില്ല. അടൂര് അര്ബന് ബാങ്കും തിരുവല്ല ഈസ്റ്റ് കോ-ഓപ്പറേറ്റീവ് ബാങ്കും ജനാധിപത്യ വിരുദ്ധമായി പിടിച്ചെടുത്ത സി.പി.എം ഇതിന് മറുപടി പറയണമെന്ന് ഡി.സി.സി പ്രസിഡന്റ് പ്രൊഫ.സതീഷ് കൊച്ചുപറമ്പില് ആവശ്യപ്പെട്ടു.
