കായംകുളം : സങ്കടം ഉള്ളില് നീറ്റലായി നിറയുമ്പോഴും പൊഴിക്കാന് ഇറ്റ് കണ്ണീരില്ലാതെ അനുഷ അച്ഛന്റെ ചിതക്ക് തീകൊളുത്തി. സൗദിയില് മരിച്ച വള്ളികുന്നം കാരാഴ്മ കണിയാന് വയലില് ഷാജി രാജന്റെ (50) യഥാര്ഥ മൃതദേഹമാണ് വീട്ടുകാര് വീണ്ടും വെള്ളിയാഴ്ച സംസ്കരിച്ചത്. കാര്ഗോ കമ്പനിയുടെ വീഴ്ചമൂലം യു.പി സ്വദേശി ജാവേദ് അഹമ്മദ് ഇദ്രീസിയുടെ (51) മൃതദേഹമാണ് ഷാജിയുടേതെന്ന് തെറ്റിദ്ധരിച്ച് ആദ്യം സംസ്കരിച്ചത്.
കഴിഞ്ഞ ജൂലൈ 18നാണ് ഷാജിയെ സൗദിയിലെ താമസ സ്ഥലത്ത് മരിച്ചനിലയില് കണ്ടെത്തിയത്. ഷാജിക്ക് പകരം ആറ് ദിവസം മുമ്പ് മരണപ്പെട്ട യു.പി സ്വദേശി ജാവേദിന്റെ മൃതദേഹമാണ് തിരുവനന്തപുരം വിമാനത്താവളത്തില് എത്തിച്ചത്. കഴിഞ്ഞ 30ന് മൃതദേഹം ഏറ്റുവാങ്ങി സംസ്കരിച്ചു.
ഇതിന് പിന്നാലെയാണ് മൃതദേഹം മാറിയ അറിയിപ്പ് എത്തുന്നത്. നടപടിക്രമങ്ങള് പൂര്ത്തീകരിച്ച് നാട്ടിലേക്ക് അയച്ചപ്പോള് കാര്ഗോ കമ്പനിക്കുണ്ടായ വീഴ്ചയാണ് മൃതദേഹം മാറാന് കാരണം. തുടര്ന്ന് വീണ്ടും നടപടികള് പൂര്ത്തിയാക്കിയാണ് യഥാര്ഥ മൃതദേഹം വീട്ടിലെത്തിക്കുന്നത്. രണ്ട് മൃതദേഹവും നാട്ടിലേക്ക് അയക്കുന്നതിന്റെ രേഖകള് ഒരു ദിവസമാണ് ശരിയാകുന്നത്. ഒരു ആംബുലന്സിലാണ് രണ്ട് മൃതദേഹവും വിമാനത്താവളത്തിലേക്ക് എത്തിച്ചത്.
ഈ സമയം പെട്ടിയില് ലേബലുകള് പതിച്ചത് മാറിപ്പോയതാണ് പിഴവായി പറയുന്നത്. ദമ്മാമില്നിന്നും ശ്രീലങ്കന് എയര്ലൈന്സില് ഷാജിയുടെയും ഇന്ഡിഗോയില് ജാവേദിന്റെയും മൃതദേഹങ്ങള് അയക്കാനാണ് ബുക്ക് ചെയ്തിരുന്നത്. ലേബല് മാറിയതിനാല് ഇതും പരസ്പരം മാറി. ജാവേദിന്റെ മൃതദേഹം ഡല്ഹിയില്നിന്ന് ആംബുലന്സില് കൊണ്ടുപോകുന്നതിനിടെ പേര് ശ്രദ്ധിച്ചപ്പോഴാണ് മൃതദേഹം മാറിയത് അറിയുന്നത്.
വിവരം ബന്ധപ്പെട്ടവരെ അറിയിക്കുമ്പോഴേക്കും ഷാജിയുടേതെന്ന ധാരണയില് ജാവേദിന്റെ മൃതദേഹം വള്ളികുന്നത്ത് ചിതയൊരുക്കി ദഹിപ്പിച്ചിരുന്നു. ഷാജി രാജന്റെ മൃതദേഹം ചടങ്ങുകളോടെ വീണ്ടും സംസ്കരിക്കാനായതില് ബന്ധുക്കള് ആശ്വാസം കൊള്ളുമ്പോള് ജാവേദിന്റെ കുടുംബത്തിനാണ് ഇരട്ടി ദുഃഖം. മൃതദേഹങ്ങള് മാറിയത് സംബന്ധിച്ച് നടപടി ആവശ്യപ്പെട്ട് ഇരുകൂട്ടരും അധികൃതര്ക്ക് പരാതി നല്കി.