ലക്‌നൗ: ഉത്തര്‍പ്രദേശിലെ അംറോഹയില്‍ അമ്മയുടെയും മകളുടെയും മൃതദേഹങ്ങള്‍ വാട്ടര്‍ ടാങ്കില്‍ കണ്ടെത്തി. 35കാരിയായ ആലിയയുടെയും 3 വയസ്സുകാരിയായ മകളുടെയും മൃതദേഹങ്ങളാണ് വാട്ടര്‍ ടാങ്കില്‍ കിടക്കുന്ന നിലയില്‍ കണ്ടെത്തിയത്. ഷക്കൂറാബാദ് ഗ്രാമത്തിലാണ് സംഭവം. വ്യാഴാഴ്ച രാവിലെ ഒമ്പത് മണിയോടെ വെള്ളമില്ലാതായപ്പോള്‍ കുടുംബാംഗങ്ങള്‍ ടാങ്ക് പരിശോധിച്ചപ്പോഴാണ് സംഭവം പുറത്തറിയുന്നത്
സംഭവത്തെ തുടര്‍ന്ന് യുവതിയുടെ ഭര്‍ത്താവിനെ പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്. ഡല്‍ഹിയില്‍ മരപ്പണിക്കാരനായി ജോലി ചെയ്യുന്ന ആസ് മുഹമ്മദിന്റെ രണ്ടാം ഭാര്യയാണ് മരിച്ച ആലിയ. ആലിയയും മകള്‍ ഇനായയും മുഹമ്മദിന്റെ ആദ്യ ഭാര്യയും ഷക്കൂറാബാദില്‍ താമസിച്ചു വരികയായിരുന്നു. അതേസമയം അമ്മയെയും മകളെയും കൊലപ്പെടുത്തി മൃതദേഹം വാട്ടര്‍ ടാങ്കില്‍ തള്ളിയെന്നാണ് ബന്ധുക്കള്‍ ആരോപിക്കുന്നത്.
