കൊച്ചി: ശിവഗിരി മുന് മഠാധിപതി ശാശ്വതീകാനന്ദയുടെ മരണവുമായി ബന്ധപ്പെട്ട അന്വേഷണത്തിന്റെ പുരോഗതി സംബന്ധിച്ച് ഹൈകോടതി റിപ്പോര്ട്ട് തേടി. പ്രത്യേക ക്രൈംബ്രാഞ്ച് സംഘത്തെ സര്ക്കാര് നിയോഗിച്ചെങ്കിലും അന്വേഷണം നിലച്ചെന്നും തുടരന്വേഷണത്തിന് ഉത്തരവിടണമെന്നും ആവശ്യപ്പെട്ട് പാലക്കാട് ആസ്ഥാനമായ ഓള് കേരള ആന്റി കറപ്ഷന് ആന്ഡ് ഹ്യൂമന്റൈറ്റ്സ് പ്രൊട്ടക്ഷന് കൗണ്സില് പ്രസിഡന്റ് ഐസക് വര്ഗീസ് നല്കിയ ഹരജിയിലാണ് ജസ്റ്റിസ് ബെച്ചു കുര്യന് തോമസിന്റെ ഇടപെടല്. ഏറണാകുളം ക്രൈംബ്രാഞ്ച് സൂപ്രണ്ട് 2015ല് നല്കിയ അന്വേഷണ പുരോഗതി റിപ്പോര്ട്ടാണ് ഫയലിലുള്ളതെന്നും പുതിയ റിപ്പോര്ട്ട് വേണമെന്നും കോടതി പറഞ്ഞു.
2002 ജൂലായ് 1 ന് സ്വാമി ശാശ്വതീകാനന്ദയെ ആലുവ അദ്വൈതാശ്രമത്തിലെ കുളിക്കടവിലാണ് മരിച്ച നിലയില് കണ്ടെത്തിയത്. ഫയര് ഫോഴ്സ് എത്തിയാണ് അന്ന് മൃതദേഹം കരയ്ക്കടുപ്പിച്ചത്. യോഗാഭ്യാസിയും ഒരു നല്ല നീന്തല് വിദഗ്ധനും ആയിരുന്നു ശാശ്വതീകാനന്ദ. അതുകൊണ്ട് തന്നെ അദ്ദേഹം പുഴയില് വീണ് മുങ്ങി മരിയ്ക്കില്ലെന്നായിരുന്നു ബന്ധുക്കളും മറ്റും പറഞ്ഞത്.
