കഠിനംകുളം : പുതുക്കുറിച്ചി ചേരമാൻതുരുത്തിൽ വീടിന്റെ രഹസ്യ അറയിൽ സൂക്ഷിച്ചിരുന്ന 87 ഗ്രാം എംഡിഎംഎ പോലീസ് പിടികൂടി. ഇവിടെനിന്ന് കസ്റ്റഡിയിലെടുത്ത പ്രതി പോലീസ് ജീപ്പിൽ കയറ്റുന്നതിനിടെ ഉദ്യോഗസ്ഥരെ വെട്ടിച്ച് ഓടി രക്ഷപെട്ടു. ചേരമാൻതുരുത്ത് അസ്ജർ മൻസിലിൽ അസ്ജർ (36) ആണ് രക്ഷപെട്ടത്. ബുധനാഴ്ചയാണ് ഡാൻസാഫ് സംഘവും കഠിനംകുളം പോലീസും ചേർന്ന് അസ്ജറിന്റെ വീട്ടിൽ പരിശോധന നടത്തിയത്. മുറിയിലെ അലമാരയിലെ രഹസ്യ അറയിൽ രണ്ട് കവറുകളിലായി എംഡിഎംഎയും ഇത് അളന്നുവിൽക്കാൻ ഉപയോഗിച്ചിരുന്ന ഇലക്ട്രോണിക് ത്രാസും പോലീസ് കണ്ടെടുത്തു.
സ്വന്തം ഉപയോഗത്തിനും പ്രദേശത്ത് വിൽപ്പന നടത്തുന്നതിനുമായാണ് ഇവ സൂക്ഷിച്ചിരുന്നതെന്ന് പ്രതി പോലീസിനോടു പറഞ്ഞു. പരിശോധന പൂർത്തിയാക്കി പ്രതിയെ പോലീസ് ജീപ്പിൽ കയറ്റുന്നതിനിടെയാണ് ഉദ്യോഗസ്ഥരുടെ കൈ തട്ടിമാറ്റി ഇയാൾ സമീപത്തെ മതിൽ ചാടിക്കടന്ന് ഓടി രക്ഷപെട്ടത്. പോലീസുകാർ പിന്തുടർന്നെങ്കിലും കണ്ടെത്താനായില്ല. പ്രതിക്കായി തിരച്ചിൽ ശക്തമാക്കിയതായി കഠിനംകുളം എസ്.എച്ച്.ഒ. സുനുമോൻ അറിയിച്ചു.
