കൊല്ലം : സംസ്ഥാന സര്‍ക്കാര്‍ പ്രഖ്യാപിച്ച സൗജന്യ ഭക്ഷ്യ കിറ്റുകളുടെ വിതരണത്തില്‍ കാലതാമസം ഉണ്ടാകുമെന്ന് സിവില്‍ സപ്ലൈസ് വകുപ്പ് . നിലവില്‍ കയറ്റി അയച്ച കിറ്റുകള്‍ക്ക് പുറമെ മാവേലി സ്റ്റോറുകളും സപ്ലൈകോ ഔട്ട്‌ലെറ്റുകളും കേന്ദ്രീകരിച്ച്‌ ബാക്കി വേണ്ടുന്ന കിറ്റുകളുടെ പാക്കിംഗ് പുരോഗമിക്കുകയാണ്. സപ്ലൈകോ ജീവനക്കാര്‍ക്കൊപ്പം സന്നദ്ധപ്രവര്‍ത്തകരെയും കൂടി നിയോഗിച്ചാണ് കിറ്റുകള്‍ തയ്യാറാക്കുന്നത്. നിശ്ചിത സമയ പരിധിക്കുള്ളില്‍ മുഴുവന്‍ കിറ്റുകളും വിതരണം ചെയ്യാനുള്ള ശ്രമം വെല്ലുവിളി ഉയര്‍ത്തുന്നുവെന്നും സിവില്‍ സപ്ലൈസ് വകുപ്പ് പറയുന്നു. ഉപ്പ് മുതല്‍ സോപ്പ് വരെ 1000 രൂപയുടെ സാധനങ്ങളാണ് സൗജന്യ കിറ്റിലുള്ളത്. അന്ത്യോദയ അന്നയോജന (മഞ്ഞ കാര്‍ഡ്) വിഭാഗത്തിനാണ് ആദ്യം കിറ്റുകള്‍ നല്‍കിയത്. തുടര്‍ന്ന് മുന്‍ഗണനാ വിഭാഗം (പിങ്ക് കാര്‍ഡ്), പൊതുവിഭാഗം (നീല, വെള്ള) എന്നിങ്ങനെയാണ് കിറ്റുകളുടെ വിതരണം നടത്തുക.
