ന്യൂഡല്ഹി : കേന്ദ്രസര്ക്കാര് മുമ്പ് അനുവദിച്ച താമസസ്ഥലങ്ങളില് നിന്ന് കാലാവധി കഴിഞ്ഞും താമസിക്കുന്നവര് ഒഴിയണമെന്ന കേന്ദ്രനിര്ദ്ദേശം ഡല്ഹി ഹൈക്കോടതി ശരിവെച്ചു. 1970 ലാണ് ഡല്ഹി നഗരത്തിലെ 40 വീടുകള് സാംസ്കാരിക ക്വോട്ടയുടെ കീഴില് കലാകാരന്മാര്ക്കു വേണ്ടി അനുവദിച്ചത്. എന്നാലിതിന്റെ പേരില് സര്ക്കാരിനുള്ള ബാധ്യത മൂലം 2014 ല് നരേന്ദ്ര മോദി സര്ക്കാര് ഹൗസിങ് ക്വോട്ട ഒഴിവാക്കാന് തീരുമാനിക്കുകയായിരുന്നു. എന്നാല്, കോടതി വിധിയില് വേദനയുണ്ടെന്നും പ്രായാധിക്യമെങ്കിലും കണക്കിലെടുത്ത് സര്ക്കാര് അനുകൂല തീരുമാനം എടുക്കുമെന്നു പ്രതീക്ഷിക്കുന്നുവെന്നും കലാകാരന്മാര് പറയുന്നു.
പ്രശസ്ത മോഹിനിയാട്ടം നര്ത്തകിയും പത്മശ്രീ പുരസ്കാര ജേതാവുമായ ഭാരതി ശിവജി, കുച്ചിപ്പുടി കലാകാരന് വി ജയരാമ റാവു, ദ്രുപത് ഗായകന് ഉസ്താദ് വാസിഫുദ്ദീന് ദാഗര് തുടങ്ങിയവര്ക്കാണു 2020 ല് ഒഴിയാനാവശ്യപ്പെട്ടു കേന്ദ്രസര്ക്കാര് നോട്ടീസ് നല്കിയത്. ഇവര് ഇതിനെതിരെ കോടതിയെ സമീപിച്ചങ്കിലും 2 മാസത്തിനകം വീടൊഴിയാന് വെള്ളിയാഴ്ച ഉത്തരവിടുകയായിരുന്നു. ആകെ 27 പേര്ക്കു നോട്ടിസ് നല്കിയിട്ടുണ്ട്.
