ന്യൂഡല്ഹി : തൊഴില് സമയത്ത് മലയാളം സംസാരിക്കരുതെന്ന് നിര്ദ്ദേശിച്ച് ഡല്ഹിയിലെ സര്ക്കാര് ആശുപത്രിയില് പുറത്തിറക്കിയ സര്ക്കുലറിനെ വിമര്ശിച്ച് കോണ്ഗ്രസ് നേതാവ് രാഹുല് ഗാന്ധി. മറ്റു ഇന്ത്യന് ഭാഷകള് പോലെതന്നെ മലയാളവും ഇന്ത്യന് ഭാഷയാണെന്നും ഭാഷാ വിവേചനം അവസാനിപ്പിക്കണമെന്നും രാഹുല് ട്വീറ്റ് ചെയ്തു.
ജി ബി പന്ത് ആശുപത്രിയാണ് മലയാളം സംസാരിക്കുന്നതിനെ വിലക്കികൊണ്ട് വിചിത്ര ഉത്തരവിറക്കിയത്. തൊഴില് സമയത്ത് ജീവനക്കാര് ഹിന്ദി, ഇംഗ്ലീഷ് ഭാഷ മാത്രമേ സംസാരിക്കാവൂ എന്നും മലയാളത്തില് സംസാരിച്ചാല് ശിക്ഷനടപടി നേരിടേണ്ടിവരുമെന്നും സര്ക്കുലറില് പറയുന്നു. തൊഴില് സമയത്ത് നഴ്സിങ് ജീവനക്കാര് തമ്മില് മലയാളം സംസാരിക്കുന്നത് രോഗികള്ക്കും സഹപ്രവര്ത്തകര്ക്കും ബുദ്ധിമുട്ടുണ്ടാകുന്നതായി പരാതി ലഭിച്ചിട്ടുണ്ടെന്നാണ് വിശദീകരണം.
