വെച്ചൂച്ചിറ : വെച്ചൂച്ചിറ കുളമാംകുഴിയിൽ പൈപ്പ് പൊട്ടി കുടിവെള്ളം വൻതോതിൽ പാഴായിപ്പോയിട്ടും നടപടിയെടുക്കാതെ വാട്ടർ അതോറിറ്റി അധികൃതർ. കുളമാംകുഴി സെന്റ് തോമസ് സ്കൂളിന് സമീപമാണ് ദിവസങ്ങളായി പൈപ്പ് ലൈൻ പൊട്ടി കുടിവെള്ളം റോഡിലേക്ക് ഒഴുകുന്നത്. നാട്ടുകാർ നിരവധി തവണ അധികൃതരെ വിവരമറിയിച്ചിട്ടും തകരാർ പരിഹരിക്കാൻ നടപടിയുണ്ടായിട്ടില്ലെന്ന് പ്രദേശവാസികൾ പറയുന്നു. മഴക്കാലത്തും കുടിവെള്ള ക്ഷാമമുള്ള മേഖലയിലാണ് ആയിരക്കണക്കിന് ലിറ്റർ കുടിവെള്ളം വഴിയരികിൽ പാഴായി പോകുന്നത്.
പൈപ്പ് പൊട്ടി വെള്ളം ഒഴുകുന്നത് മൂലം റോഡ് തകരാനും അപകടങ്ങൾ ഉണ്ടാകാനും സാധ്യതയേറെയാണ്. കൂടാതെ സ്കൂൾ കുട്ടികൾ ഉൾപ്പെടെയുള്ള കാൽനട യാത്രക്കാരും ഇതുമൂലം ഏറെ ദുരിതം അനുഭവിക്കുന്നുണ്ട്. ബന്ധപ്പെട്ട അധികൃതർ സ്ഥലത്തെത്തി പൈപ്പിലെ ചോർച്ച പരിഹരിച്ച് കുടിവെള്ള വിതരണം പുനഃസ്ഥാപിക്കണമെന്ന് നാട്ടുകാർ ആവശ്യപ്പെട്ടു.
