ഡൽഹി : സിജെപിക്ക് എതിരെ ഡൽഹി പോലീസ് ഉദ്യോഗസ്ഥരുടെ കുടുംബാംഗങ്ങൾ. അനുമതി ഇല്ലാതെയാണ് പാർലമെന്റ് മാർച്ച് നടത്തിയത്. പ്രതിഷേധക്കാർ ആണ് ആദ്യം പോലീസിന് നേരെ ആക്രമണം അഴിച്ചുവിട്ടത്. പോലീസ് സ്ഥാപിച്ച എല്ലാ ബാരിക്കേഡുകളും പ്രവർത്തകർ മറിച്ചിട്ടു. ഡ്യൂട്ടിയിലുണ്ടായിരുന്ന പോലീസുകാരെ പ്രതിഷേധക്കാർ ക്രൂരമായ ആക്രമണത്തിന് ഇരയാക്കിയതായി അവർ ആരോപിച്ചു. സമാധാനമായി പ്രതിഷേധിക്കണമെന്ന് പോലീസ് ആവർത്തിച്ചു പറഞ്ഞു. ഇതുമായി ബന്ധപ്പെട്ട ദൃശ്യങ്ങൾ ഡൽഹി പോലീസ് ഉദ്യോഗസ്ഥരുടെ കുടുംബാംഗങ്ങൾ പുറത്തുവിട്ടു.
ഒടുവിൽ പ്രതിഷേധക്കാർ അതീവ സുരക്ഷ മേഖലയായ പാർലമെന്റിന്റെ പരിസരത്തെത്തിയപ്പോഴാണ് പോലീസ് കണ്ണീർവാതകം പ്രയോഗിച്ചത്. “എന്റെ അച്ഛൻ ഡ്യൂട്ടി കഴിഞ്ഞ് വീട്ടിലെത്തിയപ്പോൾ അദ്ദേഹത്തിന്റെ കാക്കി യൂണിഫോം പൂർണ്ണമായും രക്തത്തിൽ കുളിച്ചിരുന്നു. തലയ്ക്കും കൈകൾക്കും ഗുരുതരമായി പരിക്കേറ്റിരുന്നു,” ഒരു പോലീസ് ഉദ്യോഗസ്ഥന്റെ മകൾ പറഞ്ഞു. ഡൽഹി പോലീസ് എസിപിയുടെ ഭാര്യ അവ്നീത് കൗർ, തന്റെ ഭർത്താവ് പരുക്കേറ്റ നിലയിൽ വീട്ടിലേക്ക് മടങ്ങിയ രാത്രിയെ ജീവിതത്തിലെ ഏറ്റവും വേദനാജനകമായ അനുഭവങ്ങളിലൊന്നാണെന്ന് വിശേഷിപ്പിച്ചു.
ഒരു പോലീസ് ഉദ്യോഗസ്ഥൻ വെറും യൂണിഫോമിലുള്ള ഒരാളല്ല. ഓരോ ഉദ്യോഗസ്ഥന്റെയും പിന്നിൽ ഒരു കുടുംബം, ഭാര്യ, കുട്ടികൾ, പ്രായമായ മാതാപിതാക്കൾ എന്നിവരുണ്ട്, അവർ എല്ലാ ദിവസവും സുരക്ഷിതമായി വീട്ടിലേക്ക് മടങ്ങുന്നതിനായി കാത്തിരിക്കുന്നു,’ അവർ പറഞ്ഞു. വിദ്യാർത്ഥികളുടെ നേതൃത്വത്തിൽ നടന്ന പ്രതിഷേധമായി ആദ്യം അവതരിപ്പിച്ച പ്രതിഷേധത്തിലേക്ക് സാമൂഹിക വിരുദ്ധർ നുഴഞ്ഞുകയറിയതിനെ തുടർന്നാണ് അക്രമം വർദ്ധിച്ചതെന്ന് പരിക്കേറ്റ ഒരു സബ് ഇൻസ്പെക്ടറുടെ മകൾ ആരോപിച്ചു. ഡൽഹിയിൽ സിജെപി പ്രതിഷേധത്തിനിടെയുണ്ടായ അക്രമാസക്തമായ സംഘർഷത്തിൽ നിരവധി പോലീസ് ഉദ്യോഗസ്ഥർക്ക് പരിക്കേറ്റതിന് ദിവസങ്ങൾക്ക് ശേഷമാണ് ഈ പത്രസമ്മേളനം.
