വയനാട് : വയനാട്ടിൽ നിന്നുള്ള മുതിർന്ന കോൺഗ്രസ് നേതാവും പട്ടികവർഗ്ഗ വിഭാഗത്തിൽ നിന്നുള്ള ജനപ്രതിനിധിയുമായ ഐ.സി ബാലകൃഷ്ണനെ മന്ത്രിസഭയിൽ ഉൾപ്പെടുത്തണമെന്ന ആവശ്യം രാഷ്ട്രീയ കേന്ദ്രങ്ങളിൽ ശക്തമാകുന്നു. പട്ടികവർഗ്ഗ വിഭാഗത്തിന് അർഹമായ പ്രാധാന്യം നൽകണമെന്നും ഇതിനായി സീനിയർ എം.എൽ.എ ആയ ഐ.സി ബാലകൃഷ്ണനെ പരിഗണിക്കണമെന്നും ആവശ്യപ്പെട്ട് കെ.സി വേണുഗോപാൽ, എം.കെ രാഘവൻ തുടങ്ങിയ പ്രമുഖ നേതാക്കൾ സജീവമായി രംഗത്തുണ്ട്. വയനാട് ജില്ലയ്ക്ക് അർഹമായ പരിഗണന നൽകണമെന്നതാണ് ഈ ആവശ്യത്തിന് പിന്നിലെ പ്രധാന ഘടകം.
പ്രത്യേകിച്ച് രാഹുൽ ഗാന്ധിക്കും പ്രിയങ്ക ഗാന്ധിക്കും സുരക്ഷിതമായ ഒരു മണ്ഡലം ഒരുക്കി നൽകിയ വയനാടിനെ ചേർത്തുപിടിക്കേണ്ടതുണ്ടെന്നും അവിടുത്തെ പട്ടികവർഗ്ഗ സമൂഹത്തിന് ഒരു അംഗീകാരം നൽകണമെന്നും നേതാക്കൾ ചൂണ്ടിക്കാട്ടുന്നു. ഇതിന്റെ ഭാഗമായി വയനാട്ടിലെ ഊരുമൂപ്പന്മാർ ഐ.സി ബാലകൃഷ്ണനെ മന്ത്രിയാക്കണമെന്ന് ആവശ്യപ്പെട്ടുകൊണ്ട് രാഹുൽ ഗാന്ധിക്കും പ്രിയങ്ക ഗാന്ധിക്കും ഇമെയിൽ അയച്ചിട്ടുണ്ടെന്നും റിപ്പോർട്ടുകൾ സൂചിപ്പിക്കുന്നു. വയനാട്ടിലെ സാധാരണ കോൺഗ്രസ് പ്രവർത്തകരും ഈ കാര്യത്തിൽ വളരെ ശക്തമായ നിലപാടിലാണ്. പട്ടികവർഗ്ഗ വകുപ്പിന് ഒരു മന്ത്രി ഉണ്ടാവുക എന്നതും വയനാടിന് അർഹമായ പ്രാധാന്യം ലഭിക്കുക എന്നതുമാണ് ഇവരുടെ പ്രധാന ലക്ഷ്യം.
