പത്തനംതിട്ട : തിരഞ്ഞെടുപ്പ് കമ്മീഷൻ ഉൾപ്പെടെയുള്ള ഭരണഘടനാ സംവിധാനങ്ങളെ തകർത്ത് മോഡി സർക്കാർ രാജ്യത്തെ ജനാധിപത്യത്തെ കശാപ്പ് ചെയ്യുകയാണെന്ന് ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പിൽ പറഞ്ഞു. വോട്ടു കൊള്ളക്കെതിരെ രാഹുൽ ഗാന്ധിയുടെ നേതൃത്വത്തിൽ നടക്കുന്ന പ്രക്ഷോഭ പരിപാടികളുടെ ഭാഗമായി എ.ഐ.സി.സി നേതൃത്വത്തിൽ ആരംഭിച്ചിരിക്കുന്ന അഞ്ച് കോടി ഒപ്പുശേഖരണ പരിപാടിയായ വോട്ട്ചോരി സിഗ്നേച്ചർ ക്യാമ്പയിനിന്റെ ബ്ലോക്ക്തല ഉദ്ഘാടനം തണ്ണിത്തോട്ടിൽ നിർവഹിച്ച് സംസാരിക്കുകയായിരുന്നു അദ്ദേഹം. ഇൻഡ്യയുടെ മഹത്തായ ജനാധിപത്യ പാരമ്പര്യങ്ങളും സ്വതന്ത്രമായ തിരഞ്ഞടുപ്പും ഇല്ലാതാക്കിയ നരേന്ദ്രമോഡി സർക്കാരിന് അധികാരത്തിൽ തുടരുവാൻ ധാർമ്മികമായും നിയമപരമായും അവകാശമില്ലെന്ന് ഡി.സി.സി പ്രസിഡന്റ് പറഞ്ഞു.
വാർഡ് കോൺഗ്രസ് കമ്മിറ്റികളുടെ നേതൃത്വത്തിൽ നടന്നുകൊണ്ടിരിക്കുന്ന ഗൃഹസമ്പർക്ക പരിപാടിയും അതോടൊപ്പമുള്ള ഒപ്പ് ശേഖരണ പരിപാടിയും സെപ്റ്റംബർ 30- ന് മുമ്പായി പൂർത്തീകരിക്കുമെന്ന് പ്രൊഫ. സതീഷ് കൊച്ചുപറമ്പിൽ പറഞ്ഞു. ബ്ലോക്ക് പ്രസിഡന്റ് ആർ. ദേവകുമാർ അദ്ധ്യക്ഷത വഹിച്ചു. ഡി.സി.സി സംഘടനാകാര്യ ജനറൽ സെക്രട്ടറി സാമുവൽ കിഴക്കുപുറം, ജനറൽ സെക്രട്ടറിമാരായ ഹരികുമാർ പൂതങ്കര, എലിസബത്ത് അബു, മണ്ഡലം പ്രസിഡന്റുമാരായ ബിജു മാത്യു, സണ്ണി ചള്ളക്കൽ, വിൽസൺ തുണ്ടിയത്ത്, രതീഷ് കെ. നായർ, ബ്ലോക്ക് ഭാരവാഹികളായ വസന്ത് ചിറ്റാർ, ജോയി തോമസ്, അജയൻ പിള്ള, ലിബു മാത്യു, രവി കണ്ടത്തിൽ, എ. ബഷീർ, കെ വി സാമുവൽ കിഴക്കേതിൽ, ലില്ലി ബാബു, ജോയികുട്ടി ചെടിയത്ത്, ശ്യാം എസ് നായർ, കെ എൻ സോമരാജൻ, അനിയൻ തകിടിയിൽ, റ്റി. സി ബഷീർ, ബെന്നി ഈട്ടിമൂട്ടിൽ, ബിജു ആർ പിള്ള, ഷാജിമോൻ എം. എസ് എന്നിവർ പ്രസംഗിച്ചു.
