ആലപ്പുഴ : പ്രതിപക്ഷ ഉപനേതാവ് പദവി സിപിഐയ്ക്ക് ലഭിക്കേണ്ടത് തന്നെയെന്ന് എംഎല്എയും സിപിഐ നേതാവുമായ പി പ്രസാദ്. സിപിഐയുടേത് തികച്ചും ന്യായമായ ആവശ്യമാണെന്നും അതിൽ നിന്നും പിന്നോട്ടില്ലെന്നും പി പ്രസാദ് പറഞ്ഞു. ഒരിക്കലും സിപിഐ അന്യായമായതോ അനാവശ്യമായതോ ആയ കാര്യം ഇടതുപക്ഷ മുന്നണി മുന്പാകെ ഉന്നയിച്ചിട്ടില്ല. അതുപോലെ തന്നെയാണ് ഉപനേതാവ് പദവിഎന്നും അദ്ദേഹം വ്യക്തമാക്കി. വിഷയത്തിൽ തീരുമാനമെടുക്കേണ്ടത് എൽഡിഎഫാണ്. ചർച്ചയിലൂടെ ഇതിൽ തീരുമാനമുണ്ടാകുമെന്നാണ് പ്രതീക്ഷയെന്നും പി പ്രസാദ് പറഞ്ഞു.
പി കൃഷ്ണപിള്ള സ്മാരകത്തിനായി അനുവദിച്ച ഭൂമി സര്ക്കാര് തിരിച്ചെടുത്ത സംഭവത്തിലും പി പ്രസാദ് പ്രതികരിച്ചു. സര്ക്കാര് എടുത്ത ഏറ്റവും മോശമായ തീരുമാനമാണതെന്ന് പി പ്രസാദ് പറഞ്ഞു. പി കൃഷ്ണപിള്ള എന്ന പേരാണോ യുഡിഎഫിന് പ്രശ്നമെന്ന് പി പ്രസാദ് ചോദിച്ചു. നടപടി രാഷ്ട്രീയ വിവേചനമാണ്. പി കൃഷ്ണപിള്ള സാംസ്കാരിക കേന്ദ്രം അനിവാര്യമായ പദ്ധതിയാണ്. നടപടി പിന്വലിക്കണമെന്ന് ആവശ്യപ്പെട്ട് സാംസ്കാരിക മന്ത്രിക്ക് കത്ത് നല്കുമെന്നും പി പ്രസാദ് വ്യക്തമാക്കി.
