ബെംഗളൂരു: മുന് പ്രധാനമന്ത്രിയും ജെഡിഎസ് ദേശീയ അധ്യക്ഷനുമായ എച്ച്.ഡി ദേവഗൗഡയും മുതിര്ന്ന കോണ്ഗ്രസ് നേതാവ് മല്ലികാര്ജുന് ഖാര്ഗെയും കര്ണാടകയില് നിന്ന് രാജ്യസഭയിലേക്ക് എതിരില്ലാതെ തെരഞ്ഞെടുക്കപ്പെട്ടു. നിയമസഭ സെക്രട്ടറി ഇക്കാര്യം ഔദ്യോഗികമായി പ്രഖ്യാപിച്ചു. കോണ്ഗ്രസിന്റെകൂടി പിന്തുണയിലാണ് 87-കാരനായ ദേവഗൗഡ തെരഞ്ഞെടുക്കപ്പെട്ടത്. ആദ്യമായാണ് ഖാര്ഗെ രാജ്യസഭാംഗമാകുന്നത്.
കൂടുതല് വോട്ട് ആവശ്യമായി വന്നാല് ദേവഗൗഡയ്ക്കു കോണ്ഗ്രസ് വോട്ട് നല്കുമെന്നു പാര്ട്ടി നേതൃത്വം വ്യക്തമാക്കിയിരുന്നു. എന്നാല് ബിജെപി മൂന്നാമതൊരു സ്ഥാനാര്ഥിയെ നിര്ത്താതിരുന്നതിനാല് കോണ്ഗ്രസിന്റെ വോട്ട് വേണ്ടിവന്നില്ല.
ഇതു രണ്ടാം തവണയാണ് ദേവഗൗഡ രാജ്യസഭയിലേക്ക് തെരഞ്ഞെടുക്കപ്പെടുന്നത്. 1996-ല് പ്രധാനമന്ത്രിയായിരുന്നപ്പോഴാണ് അദ്ദേഹം ആദ്യമായി തെരഞ്ഞെടുക്കപ്പെട്ടത്. ഖാര്ഗെ കല്ബുര്ഗിയില് നിന്നും ദേവഗൗഡ തുംകൂര് മണ്ഡലത്തില് നിന്നും കഴിഞ്ഞ ലോകസഭ തെരഞ്ഞെടുപ്പില് ബിജെപി സ്ഥാനാര്ഥികളോട് പരാജയപ്പെട്ടിരുന്നു. ബിജെപിയുടെ രാജ്യസഭാ സ്ഥാനാര്ഥികളായ അശോക് ഗസ്തിയും ഹിരന്ന കടാഡിയും കൂടി എതിരില്ലാതെ തെരഞ്ഞെടുക്കപ്പെട്ടതോടെ 19ന് നടക്കേണ്ട വോട്ടെടുപ്പ് ഒഴിവായി.
