കൊല്ലം : കൊല്ലത്ത് നിന്ന് കാണാതായ ആറുവയസ്സുകാരി ദേവനന്ദയുടെ മൃതദേഹം കണ്ടെടുത്ത കാഴ്ചയുടെ ഞെട്ടല് വിട്ടു മാറിയിട്ടില്ല. കേരളം ഒന്നടങ്കം നടത്തിയ എല്ലാ പ്രാര്ത്ഥനകളും വിഫലമായിരിക്കുന്നു. എന്നാല് ദേവനന്ദയുടെ മരണത്തില് ദുരൂഹതയുണ്ടെന്ന് നാട്ടുകാര് ആരോപിക്കുന്നു. കുട്ടിയെ ആരോ അപായപ്പെടുത്തിയതാകാമെന്ന് സമീപവാസികള് തറപ്പിച്ചു പറയുന്നു. വീടിന് കുറച്ചു ദൂരെയുള്ള ഇത്തിക്കരയാറ്റില് നിന്നാണ് മൃതദേഹം കണ്ടെടുത്തത്. മുങ്ങല് വിദഗ്ധര് നടത്തിയ തെരച്ചിലിലാണ് മൃതദേഹം കണ്ടെടുത്തത്. ദേവനന്ദയുെടെ വീട്ടില് നിന്ന് 70 മീറ്റര് അകലെയാണ് പുഴ ഒഴുകുന്നത്. പുഴയില് കുറ്റിക്കാടിനോട് ചേര്ന്ന് കമിഴ്ന്ന് കിടക്കുന്ന നിലയിലാണ് മൃതദേഹം കണ്ടെടുത്തത്.
കുട്ടി ഒറ്റക്ക് ഇത്രയും ദൂരം പോവില്ലെന്നാണ് വീട്ടുകാരും നാട്ടുകാരും ഒരുപോലെ പറയുന്നത്. കളിച്ചുകൊണ്ടിരുന്ന കുട്ടിയെ പെട്ടെന്നു കാണാതായതും ഇപ്പോള് മൃതദേഹം കണ്ടെത്തിയ സാഹചര്യവും ദുരൂഹത ഉണര്ത്തുന്നതാണെന്നു നാട്ടുകാര് പറയുന്നു. ഇക്കാര്യത്തില് കൂടുതല് അന്വേഷണം വേണമെന്നാണ് നാട്ടുകാരുടെ വാദം.
