തിരുവനന്തപുരം: ദേവികുളം മണ്ഡലത്തിലെ തിരഞ്ഞെടുപ്പ് ഫലം ഹൈക്കോടതി റദ്ദാക്കിയ വിധിക്കെതിരെ സിപിഎം സുപ്രീംകോടതിയെ സമീപിക്കും. സുപ്രീംകോടതിയില് നാളെ തന്നെ അപ്പീല് നല്കാനാണ് തീരുമാനം. സിപിഎം സംസ്ഥാന സെക്രട്ടേറിയറ്റിലാണ് ഇത് സംബന്ധിച്ച് തീരുമാനമെടുത്തിരിക്കുന്നത്. യുഡിഎഫ് സ്ഥാനാര്ഥിയായി മത്സരിച്ചു പരാജയപ്പെട്ട ഡി.കുമാര് ഹൈക്കോടതിയില് സമര്പ്പിച്ച ഹര്ജിയിലാണ് ഉത്തരവ്. പട്ടികജാതി സംവരണമണ്ഡലമായ ദേവികുളത്തു നിന്നു തിരഞ്ഞെടുക്കപ്പെടാന് പട്ടികജാതിക്കാരന് അല്ലാത്ത എ.രാജയ്ക്ക് അവകാശമില്ലെന്ന് ആരോപിച്ചാണു ഡി.കുമാര് ഹൈക്കോടതിയില് ഹര്ജി സമര്പ്പിച്ചത്.
പട്ടികജാതി സംവരണ വിഭാഗത്തില്പ്പെട്ട ദേവികുളം മണ്ഡലത്തില് വ്യാജ ജാതി സര്ട്ടിഫിക്കറ്റ് ഹാജരാക്കിയാണ് രാജ മത്സരിച്ചതെന്ന യുഡിഎഫ് സ്ഥാനാര്ത്ഥി ഡി കുമാറിന്റെ ഹര്ജി അംഗീകരിച്ചാണ് ഹൈക്കോടതിയിടെ നടപടി. 2021ലെ നിയമസഭാ തിരഞ്ഞെടുപ്പില് കോണ്ഗ്രസ് സ്ഥാനാര്ഥി ഡി. കുമാറിനെതിരെ എ. രാജ 7847 വോട്ടിന്റെ ഭൂരിപക്ഷത്തിനാണ് വിജയിച്ചത്. ക്രിസ്തുമത വിശ്വാസികളായ അന്തോണി-എസ്തര് ദമ്പതികളുടെ മകനായി ജനിച്ച എ.രാജ ക്രിസ്ത്യാനിയായി ജീവിക്കുന്നയാളാണെന്നും എ.രാജയുടെ ഭാര്യ ഷൈനിപ്രിയയും ക്രിസ്തുമത വിശ്വാസിയാണെന്നും ഇരുവരുടെയും വിവാഹം ക്രിസ്തുമത വിശ്വാസപ്രകാരമാണു നടന്നതെന്നുമാണു ഡി.കുമാറിന്റെ വാദം.