കിടങ്ങന്നൂർ: ശബരിമല അയ്യപ്പ സ്വാമിക്ക് ചാർത്തുന്നതിനായി ശബരി സേവാ ട്രസ്റ്റിന്റെ നേതൃത്വത്തിൽ തിരുവാഭരണം കിടങ്ങന്നൂരിൽ എത്തിച്ചേർന്നപ്പോൾ ഭക്തസഹസ്രങ്ങൾ ഭക്തിനിർഭരമായ സ്വീകരണം നൽകി. ശരണംവിളികളാൽ മുഖരിതമായ അന്തരീക്ഷത്തിൽ നൂറുകണക്കിന് ഭക്തരാണ് പുണ്യദർശനത്തിനായി എത്തിയത്. രാവിലെ പുറപ്പെട്ട ഘോഷയാത്രയെ കിടങ്ങന്നൂരിൽ വെച്ച് ശബരി സേവാ ട്രസ്റ്റും യൂത്ത് കോൺഗ്രസ് പ്രവർത്തകരും ചേർന്ന് സ്വീകരിച്ചു. യൂത്ത് കോൺഗ്രസ് സംസ്ഥാന സെക്രട്ടറി നഹാസ് പത്തനംതിട്ട, എം സി ആരിഫ്, അനിൽ ബാബു ഇരവി പേരൂർ, പ്രേം സാഗർ, വിനു സുരേന്ദ്രൻ ശബരി സേവാ ട്രസ്റ്റ് ഭാരവാഹികൾ തുടങ്ങിയവർ ചടങ്ങിൽ പങ്കെടുത്തു.
സ്വീകരണത്തിന് ശേഷം ഭക്തർക്ക് ഭക്ഷണവിതരണവും നടന്നു. വരും ദിവസങ്ങളിൽ വിവിധ കേന്ദ്രങ്ങളിലെ സ്വീകരണങ്ങൾക്ക് ശേഷം മകരവിളക്ക് ദർശനത്തിന് മുന്നോടിയായി തിരുവാഭരണം ശബരിമലയിൽ എത്തിക്കും. 14 ന് മകരവിളക്ക് ദർശനത്തിന് വരുന്ന അയ്യപ്പഭക്തർക്ക് അന്നദാനവും സൗജന്യ മെഗാ മെഡിക്കൽ ക്യാമ്പും സംഘടിപ്പിക്കുമെന്ന് നഹാസ് പത്തനംതിട്ട അറിയിച്ചു.
