തിരുവനന്തപുരം : നോക്കുകൂലി ആവശ്യപ്പെട്ടതായി പരാതി ലഭിച്ചാല് എഫ്.ഐ.ആര് രജിസ്റ്റര് ചെയ്ത് അന്വേഷണം നടത്താന് സംസ്ഥാന പോലിസ് മേധാവി അനില്കാന്ത് ജില്ലാ പോലിസ് മേധാവിമാര്ക്ക് നിര്ദ്ദേശം നല്കി. നോക്കുകൂലി സംബന്ധിച്ച കേസുകളില് പിടിച്ചുപറിക്കും മറ്റ് കുറ്റകൃത്യങ്ങള്ക്കുമുളള വകുപ്പുകള് ഉള്പ്പെടുത്തി കേസ് രജിസ്റ്റര് ചെയ്യണമെന്ന ഹൈക്കോടതി നിര്ദ്ദേശത്തെത്തുടര്ന്നാണ് സംസ്ഥാന പോലിസ് മേധാവി സര്ക്കുലര് പുറപ്പെടുവിച്ചത്.
മുന്തിയ പരിഗണന നല്കി കേസ് അന്വേഷിച്ച് ചാര്ജ് ഷീറ്റ് സമര്പ്പിക്കാനും നിര്ദ്ദേശമുണ്ട്. സ്റ്റേഷന് ഹൗസ് ഓഫിസര്മാര് അവസരത്തിനൊത്തുയര്ന്ന് പ്രവര്ത്തിച്ച് പരാതിക്കാരുടെ ബുദ്ധിമുട്ടുകളും ചെയ്യാത്ത ജോലിക്ക് കൂലി നല്കേണ്ട അവസ്ഥയും ഒഴിവാക്കാന് നടപടി സ്വീകരിക്കണമെന്നും ഡിജിപി നിര്ദേശിച്ചു.
