റാന്നി : സമ്പൂർണ ഡിജിറ്റലൈസ്ഡ് പേയ്മെന്റ് സംവിധാനവുമായി പഴവങ്ങാടി ഗ്രാമ പഞ്ചായത്ത്. പഞ്ചായത്തിന്റെ ഡിജിറ്റൽ വത്കരണനയത്തിന്റെ ഭാഗമായി സമ്പർക്ക രഹിത പണമിടപാട് പ്രോത്സാഹിപ്പിക്കുക എന്ന ഉദ്ദേശ്യത്തോടെ സമ്പൂർണ ഡിജിറ്റലൈസ്ഡ് പേയ്മെന്റ് സംവിധാനവുമായി റാന്നി പഴവങ്ങാടി ഗ്രാമ പഞ്ചായത്ത്. സൗത്ത് ഇന്ത്യൻ ബാങ്കുമായി സഹകരിച്ചാണ് പദ്ധതി നടപ്പാക്കിയിരിക്കുന്നത്. ഈ സൗകര്യം പ്രയോജനപ്പെടുത്തി ജനങ്ങൾക്കു ക്രെഡിറ്റ്/ഡെബിറ്റ് കാർഡ് മുഖേന വിവിധ സേവനങ്ങൾക്കുള്ള പണം പഞ്ചായത്തില് അടയ്ക്കാവുന്നതാണ്. കൂടാതെ ക്യൂആര് കോഡു മുഖേനയുള്ള പേയ്മെന്റ് സൗകര്യവും ലഭ്യമാണ്.
പഞ്ചായത്തിലടയ്ക്കേണ്ട നികുതികൾ ഉൾപ്പടെ എല്ലാ പണമിടപാടുകളും സമ്പൂർണ ഡിജിറ്റലൈസേഷന്റെ ഭാഗമായി പൊതുജനങ്ങൾക്ക് പരമാവധി പ്രയോജനപ്പെടുത്തുവാന് കഴിയും. കോവിഡ് പശ്ചാത്തലത്തിൽ സമ്പർക്ക രഹിത സേവനങ്ങൾ ജനങ്ങൾക്കു പ്രയോജനപ്രദമാണ്. പഞ്ചായത്തു പ്രസിഡന്റ് അനിത അനിൽകുമാർ ഡിജിറ്റൽ സേവനങ്ങളുടെ ഉദ്ഘാടനം നിർവഹിച്ചു. വൈസ് പ്രസിഡന്റ് ജോൺ എബ്രഹാം അധ്യക്ഷത വഹിച്ചു.
ക്ഷേമകാര്യ സ്റ്റാന്റിങ് കമ്മറ്റി ചെയർമാൻ ചാക്കോ വളയനാട്ട്,ആരോഗ്യ വിദ്യാഭ്യാസ സ്ഥിരം സമതി അദ്യക്ഷ സീമ മാത്യു, ഗ്രാമപഞ്ചായത്ത് അംഗങ്ങളായ ജോയ്സി ചാക്കോ, ബ്രില്ലി ബോബി എബ്രഹാം, ബിനിറ്റ് മാത്യു, ബിജി വര്ഗീസ്, ഷൈനി പുളിക്കൽ, എം.ജി ശ്രീകുമാർ, സെക്രട്ടറി കനകമണി, സലാമത്തു, സൗത്ത് ഇന്ത്യൻ ബാങ്കിന്റെ റാന്നി ശാഖ മാനേജർ ജോഷി പി ജോൺ ,ബാങ്കിന്റെ റീജിയണൽ സെയിൽസ് മാനേജർ സജിത് എസ് പിള്ള, ഓഫീസർ ജ്യോതിഷ് ബാബു എന്നിവർ പ്രസംഗിച്ചു.
