കൊച്ചി : നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് സൈബര് വിദഗ്ധന് സായ് ശങ്കറിന് ക്രൈംബ്രാഞ്ച് നോട്ടീസ്. ചോദ്യം ചെയ്യലിനു ഹാജരാകണമെന്ന് ആവശ്യപ്പെട്ടാണ് നോട്ടീസ് അയച്ചിരിക്കുന്നത്. വ്യാജ തെളിവുകള് നല്കാന് ക്രൈംബ്രാഞ്ച് ഭീഷണിപ്പെടുത്തുകയാണെന്ന് നേരത്തെ സായ് ശങ്കര് ആരോപിച്ചിരുന്നു. സായ് ശങ്കറുടെ കോഴിക്കോട്ടെ വീട്ടില് ക്രൈംബ്രാഞ്ച് സംഘം പരിശോധന നടത്തുകയാണ്. വധഗൂഢാലോചനയുമായി ബന്ധപ്പെട്ട് സായ് ശങ്കറിന് കൂടുതല് കാര്യങ്ങള് അറിയാമെന്നാണ് ക്രൈംബ്രാഞ്ച് കരുതുന്നത്. നാളെ 11 മണിക്ക് ഹാജരാകണമെന്നാണ് ക്രൈംബ്രാഞ്ചിന്റെ ആവശ്യം. എന്നാല്, നാളെ ഹാജരാകണോ എന്നതില് ഇതുവരെ സായ് ശങ്കര് തീരുമാനം എടുത്തിട്ടില്ല എന്നാണ് വിവരം.
വധഗൂഢാലോചന കേസില് ദിലീപിനെ വിളിച്ചവരില് ഡിഐജിക്കും പങ്കുണ്ടെന്ന വിവരം പുറത്തുവന്നിരുന്നു. ഇതില് ക്രൈംബ്രാഞ്ച് അന്വേഷണം ആരംഭിച്ചു. 4 മിനിറ്റ് 12 സെക്കന്ഡാണ് ഡിഐജി സഞ്ജയ് കുമാര് ഗുരുദിന് ദിലീപുമായി സംസാരിച്ചത്. ജനുവരി 8 ന് വാട്സ് ആപ് കാള് വഴിയായിരുന്നു ആശയവിനിമയം. ഡിഐജി സഞ്ജയ് കുമാര് ഗുരുദിന് വിളിച്ചതിന് ശേഷമാണ് ദിലീപ് ഫോണ് കൈമാറിയത്. അഭിഭാഷകനുമായി ഫോണില് ബന്ധപ്പെട്ടതിന് പിന്നാലെയായിരുന്നു ഡിഐജി സഞ്ജയ് കുമാര് ഗുരുദിനുമായി ദിലീപ് സംസാരിച്ചത്. സംവിധായകന് ബാലചന്ദ്രകുമാറിന്റെ പരാതിക്ക് പിന്നാലെയാണ് ഫോണ് വിളിച്ചത്.
