കോന്നി : കല്ലേലി – ഊട്ടുപാറ റോഡിന്റെ ശോചനീയാവസ്ഥ ജനങ്ങളെ ദുരിതത്തിലാക്കുന്നു. അക്കരക്കാലാപ്പടി മുതല് തേക്കുതോട്ടം മുക്ക് വരെയുള്ള മൂന്നര കിലോമീറ്റര് റോഡാണ് കാല്നട യാത്രപോലും ദുഷ്കരമായി തകര്ന്ന് കിടക്കുന്നത്. ശക്തമായ മഴയെ തുടര്ന്ന് റോഡിലെ മെറ്റലുകളും ഇളകി പോയി. റോഡില് വലിയ കുഴികള് രൂപപ്പെട്ടതിനെ തുടര്ന്ന് നിരവധി ഇരുചക്ര വാഹനങ്ങളാണ് അപകടത്തില്പ്പെട്ടിട്ടുള്ളത്.
പൊതുമരാമത്ത് വകുപ്പില് നിന്ന് മൂന്ന് കോടി രൂപയാണ് റോഡ് നിര്മ്മാണത്തിനായി അനുവദിച്ചത്. അക്കരക്കാലാപ്പടി, ഊട്ടുപാറ, പുളിഞ്ചാണി, തേക്കുതോട്ടം മുക്ക് എന്നിവടങ്ങളിലൂടെ കടന്ന് പോകുന്ന റോഡിന് മൂന്നര കിലോമീറ്ററോളം ദൂരമുണ്ട്. അഞ്ചരമീറ്റര് വീതിയിലാണ് റോഡ് നിര്മ്മിക്കേണ്ടത് 40എം.എം.ക്ലോസ് ഗ്രേഡഡ് ടാറിങ് ഉപയോഗിച്ചാണ് റോഡ് നിര്മ്മിക്കുന്നത്. കാവുങ്കല് കണ്സ്ട്രക്ഷന് കമ്പിനിയാണ് നിര്മ്മാണകരാര് എടുത്തിരിക്കുന്നത്.
