മുതുകുളം : മുതുകുളം കൃഷിഭവൻ-കല്ലുംമൂട് റോഡിലൂടെയുള്ള യാത്ര ദുരിതപൂർണമായി. റോഡിന്റെ മിക്കയിടവും പൊട്ടിയിളകിയ നിലയിലാണ്. മഴവെള്ളംകൂടി നിറയുമ്പോൾ ഇതുവഴിയുള്ള യാത്ര ഏറെ ദുഷ്കരമാണ്. ദിവസവും സ്കൂൾക്കുട്ടികളടക്കം നൂറുകണക്കിനു യാത്രക്കാർ ആശ്രയിക്കുന്ന പ്രധാന ഗ്രാമീണപാതയാണിത്. കായംകുളം-കാർത്തികപ്പള്ളി റോഡ് കല്ലുംമൂട് ജംഗ്ഷ നിൽനിന്ന് മുതുകുളംസാമൂഹികാരോഗ്യകേന്ദ്രത്തിലേക്കും കൃഷിഭവനിലേക്കും മറ്റും ഇതുവഴി എളുപ്പമെത്താം.
നേരത്തേതന്നെ റോഡിനു നാശമുണ്ടായിരുന്നു. അടുത്തിടെ പാണ്ഡവർകാവ് ജംഗ്ഷനില് പുതിയ കലുങ്കു പണിതപ്പോൾ വാഹനങ്ങൾ ഇതുവഴി തിരിച്ചുവിട്ടു. ഇതോടെ റോഡ് കൂടുതൽ തകർന്നു. ബുദ്ധാ കോളേജ് ഓഫ് ടീച്ചർ എജുക്കേഷൻ കവാടത്തിനു കിഴക്കും വയലിൽ വടക്കുഭാഗവുമൊക്കെ വലിയതോതിൽ തകർന്നിട്ടുണ്ട്. മഴ കനക്കുമ്പോൾ കൃഷിഭവന്റെ കിഴക്കുവശവും ബുദ്ധാ കോളേജ് കവാടത്തിനു കിഴക്കോട്ടും റോഡിൽ വലിയ വെള്ളക്കെട്ടു രൂപപ്പെടാറുണ്ട്. ഇതും വലിയ ദുരിതത്തിനിടയാക്കുന്നു.
