പത്തനംതിട്ട : പൈപ്പ് ലൈൻ സ്ഥാപിക്കുന്നതിനായി വെട്ടിപ്പൊളിച്ച റോഡിലെ കുഴികൾ അടച്ചു. പത്തനംതിട്ട ജില്ലാ സ്റ്റേഡിയം റോഡ്, സെന്റ് പീറ്റേഴ്സ് ജങ്ഷൻ റോഡ്, കല്ലറക്കടവ്, അഴൂർ റോഡ് തുടങ്ങിയയിടങ്ങളിലാണ് ടാറിങ് നടത്തിയത്. താത്കാലികമായി ചെയ്തിരുന്ന കോൺക്രീറ്റുകൾ ഇളക്കി മാറ്റിയിട്ടാണ് ടാറിങ് നടത്തിയത്. പൊളിച്ചിട്ടിരുന്ന റോഡുകൾ കാരണം നിരവധി അപകടങ്ങൾ ഇവിടെ ഉണ്ടായിരുന്നു.
തട്ടിക്കൂട്ടിയ റോഡുകളുടെ നവീകരണ പ്രവർത്തനത്തിനായി നാട്ടുകാർ പലപ്പോഴായി പരാതിപ്പെട്ടിരുന്നു. മാസങ്ങളായി തകർന്നുകിടന്ന റോഡ് ആദ്യം കോൺക്രീറ്റ് ചെയ്യുന്നതിനായി കല്ലുകൾ പലയിടത്തും നിരത്തിയിട്ടിരുന്നു. ഇത് റോഡിലെ അപകടങ്ങൾ വർധിപ്പിച്ചു. ഇതിനുശേഷം ഈ റോഡുകൾ കോൺക്രീറ്റ് ചെയ്തത് മഴയോടെ വീണ്ടും തകർന്നിരുന്നു.
