ചെന്നൈ : വര്ഷങ്ങളായി സനാതന് ധര്മ്മമാണ് ഇന്ത്യയെ നയിക്കുന്നതെന്ന് തമിഴ്നാട് ഗവര്ണര് ആര്.എന് രവിയുടെ പ്രസ്താവനക്കെതിരെ ഡി.എം.കെ ട്രഷററും മുന് കേന്ദ്രമന്ത്രിയുമായ ടി.ആര് ബാലു. ഗവര്ണര് പ്രസ്താവന പിന്വലിച്ച് മാപ്പ് പറയണമെന്നും ഈ പ്രസംഗത്തെ അപലപിക്കുന്നതായും ബാലു പുറത്തിറക്കിയ പത്രക്കുറിപ്പില് പറഞ്ഞു. അയ്യപ്പ ഭക്തിഗാനമായ ‘ഹരിവരാസനം’ 100ാം വാര്ഷിക പരിപാടിക്കിടയിലാണ് ഗവര്ണര് ആര്.എന് രവി സനാതന് ധര്മ്മത്തെക്കുറിച്ച് അഭിപ്രായം പറഞ്ഞത്. സനാതന് ധര്മ്മത്തെ മഹത്വവത്കരിച്ച ഗവര്ണര്, ആയിരക്കണക്കിന് വര്ഷങ്ങളായി സനാതന് ധര്മ്മമാണ് ഇന്ത്യയെ നയിക്കുന്നതെന്നും വ്യക്തമാക്കുകയായിരുന്നു.
യുഎസ് നടത്തിയ ബോംബാക്രമണത്തെത്തുടര്ന്ന് അഫ്ഗാന് നഗരങ്ങളായ പെഷവാറും കാണ്ഡഹാറും തകര്ത്തതിനെ ന്യായീകരിച്ച ഗവര്ണറുടെ പരാമര്ശം രാജ്യത്ത് ആഭ്യന്തര കലാപത്തിന് കാരണമാകുമെന്നും ഡി.എം.കെയുടെ പ്രസ്താവനയില് പറയുന്നുണ്ട്. സമാധാനം കാംക്ഷിക്കുന്ന തമിഴ്നാട്ടില് ഗവര്ണറുടെ പ്രസ്താവന ശക്തമായ സംശയങ്ങളും ഭയവും സൃഷ്ടിച്ചിട്ടുണ്ടെന്നും മുന് കേന്ദ്രമന്ത്രി ആരോപിച്ചു. ഇന്ത്യയെ നയിക്കുന്നത് സനാതന് ധര്മ്മമല്ല, ഇന്ത്യന് ഭരണഘടനയാണന്നും. മനു ധര്മ്മമല്ല ജനാധിപത്യമാണ് രാജ്യം ഭരിക്കുന്നതെന്നും മുന് കേന്ദ്രമന്ത്രി പറഞ്ഞു. ഗവര്ണര് തന്റെ അഭിപ്രായങ്ങള് പിന്വലിക്കണമെന്നും ഭാവിയില് ഇത്തരം പ്രസ്താവനകള് ഒഴിവാക്കുമെന്ന് ഉറപ്പാക്കണമെന്നും അദ്ദേഹം ആവശ്യപ്പെട്ടു
