ചെന്നൈ: ബിജെപി അധ്യക്ഷന് അണ്ണാമലൈക്കെതിരെ മാനനഷ്ടക്കേസ് ഫയല് ചെയ്ത് തമിഴ്നാട് സര്ക്കാര്. ഡിഎംകെ ഫയല്സിന്റെ പേരിലാണ് നടപടി. മുഖ്യമന്ത്രി എം കെ സ്റ്റാലിനെ അണ്ണാമലൈ അപകീര്ത്തിപ്പെടുത്തുകയാണ് ചെയ്തതെന്ന് സര്ക്കാര് വാദിക്കുന്നു. 2023 ഏപ്രിലില് ഡിഎംകെയും ഡിഎംകെ നേതൃത്വത്തിലുള്ള സര്ക്കാരും അഴിമതി നടത്തിയെന്ന് ആരോപിച്ച് തമിഴ്നാട് ബിജെപി ഡിഎംകെ ഫയലുകള് പുറത്തുവിട്ടതിന് പിന്നാലെയാണ് നടപടി.
തമിഴ്നാട്ടില് മികച്ച ഭരണം നടത്തുന്ന മുഖ്യമന്ത്രിക്കെതിരെ അടിസ്ഥാന തെളിവുകളില്ലാതെയാണ് ആരോപണങ്ങള് ഉന്നയിച്ചിരിക്കുന്നതെന്നും ഹര്ജിക്കാരന് ചൂണ്ടിക്കാട്ടി. ഏപ്രില് 14ന് അണ്ണാമലൈ മാധ്യമങ്ങള്ക്ക് നല്കിയ ഫയലുകള് അടിസ്ഥാനരഹിതവും സാധുവായ തെളിവുകളുമില്ലാത്തതാണെന്നും ഹര്ജിക്കാരന് വ്യക്തമാക്കിയിരുന്നു. 2011ല് ചെന്നൈ മെട്രോയുടെ കരാര് ഉറപ്പിക്കാന് എം കെ സ്റ്റാലിന് 200 കോടി രൂപ കോഴ വാങ്ങിയെന്ന് അണ്ണാമലൈ അടുത്തിടെ ആരോപിച്ചിരുന്നു.
