കന്യാകുമാരി: പര്യടനത്തിന്റെ ഭാഗമായി എംഎല്‍എ ഉദയനിധി സ്റ്റാലിന്‍ സന്ദര്‍ശനം നടത്തിയ തമിഴ്നാട്ടിലെ കന്യാകുമാരിയിലാണ് ഡിഎംകെ പ്രവര്‍ത്തകര്‍ തമ്മില്‍ ചേരി തിരിഞ്ഞ് സംഘര്‍ഷമുണ്ടായത്. മത്സ്യത്തൊഴിലാളികളെ കാണാനും പാര്‍ട്ടി ഓഫീസുകള്‍ തുറക്കാനും പാര്‍ട്ടി പ്രചാരണം ആരംഭിക്കാനുമായാണ് ഉദയനിധി സ്റ്റാലിന്‍ കന്യാകുമാരിയില്‍ എത്തിയത്.
തിങ്കളാഴ്ച പാര്‍ട്ടി പ്രവര്‍ത്തകര്‍ക്കൊപ്പം എത്തിയ മന്ത്രി മനോ തങ്കരാജ് ഉദയനിധിയെ സ്വീകരിച്ചു. മുന്‍ ഡിഎംകെ എംഎല്‍എമാരായ ഓസ്റ്റിന്‍, ഹെലന്‍ ഡേവിഡ്‌സണ്‍ എന്നിവരും എംഎല്‍എയെ കാണാന്‍ സ്റ്റേറ്റ് ഗസ്റ്റ് ഹൗസില്‍ എത്തിയിരുന്നുവെങ്കിലും അകത്തു കടക്കാന്‍ അനുവദിച്ചില്ല. ഓസ്റ്റിനും ഹെലന്‍ ഡേവിഡ്‌സനും ഉളളിലേക്ക് കടക്കാതിരിക്കാന്‍ വാതിലുകള്‍ അടച്ചിട്ടിരുന്നതായി പ്രവര്‍ത്തകര്‍ ആരോപിച്ചു. ഇതില്‍ പ്രകോപിതരായ രണ്ട് ഗ്രൂപ്പുകള്‍ തമ്മില്‍ വാക്കേറ്റവും കയ്യാങ്കളിലും ഉണ്ടായി. പ്രവര്‍ത്തകര്‍ പരസ്പരം ആക്രമിക്കുന്ന ദൃശ്യങ്ങള്‍ സാമൂഹ്യമാധ്യമങ്ങളില്‍ വൈറലാണ്.
