ആലപ്പുഴ: കേന്ദ്രീയ വിദ്യാലയത്തിനുള്ള സാധ്യത പരിശോധിക്കുന്നതിനായി ചേന്നം പള്ളിപ്പുറം ഗ്രാമപഞ്ചായത്തിലെ ഇന്ഫോ പാര്ക്കിനോട് ചേര്ന്ന് കേരള സ്റ്റേറ്റ് ഇന്ഫര്മേഷന് ടെക്നോളജി ഇന്ഫ്രാസ്ട്രക്ചര് ലിമിറ്റഡിന്റെ (കെ.എസ്.ഐ.ടി.ഐ.എല്) കൈവശമുള്ള സ്ഥലം എ.എം. ആരിഫ് എം.പി, ദലീമ ജോജോ എം.എല്.എ, ജില്ല കളക്ടര് വി.ആര്. കൃഷ്ണതേജ തുടങ്ങിയവര് സന്ദര്ശിച്ചു.
കെ.എസ്.ഐ.ടി.ഐ.എല്ലിന്റെ കൈവശമുള്ള 5 ഏക്കര് സ്ഥലമാണ് കേന്ദ്രീയ വിദ്യാലയത്തിനായി ഏറ്റെടുക്കാന് ലക്ഷ്യമിടുന്നത്. സര്വ്വേ റിപ്പോര്ട്ട് ഒരാഴ്ചക്കുള്ളില് സമര്പ്പിക്കാന് തഹസില്ദാര്ക്ക് നിര്ദ്ദേശം നല്കി. പ്രധാനപ്പെട്ട വ്യവസായ കേന്ദ്രമായി വളര്ന്നു കൊണ്ടിരിക്കുന്ന പള്ളിപ്പുറത്തേക്ക് കൂടുതല് വിദഗ്ധ തൊഴിലാളികളെ ആകര്ഷിക്കുന്നതിനായി പ്രദേശത്ത് മെച്ചപ്പെട്ട വിദ്യാഭ്യാസ സംവിധാനം ഒരുക്കേണ്ടത് അത്യാവശ്യമാണ്. അതിനാലാണ് കേന്ദ്രീയ വിദ്യാലയം ഇവിടെ സ്ഥാപിക്കുന്നതിനുള്ള സാധ്യത പരിഗണിക്കുന്നത്.
ഇന്ഫോപാര്ക്കിനെ ദേശീയപാതയോട് ബന്ധിപ്പിച്ച് നിര്മ്മിക്കുന്ന വയലാര് കവല – ഇന്ഫോ പാര്ക്ക് പാലത്തിന്റെ ഭൂമി ഏറ്റെടുക്കല് നടപടികള് കണ്ടാണ് സംഘം മടങ്ങിയത്. ചേര്ത്തല തഹസില്ദാര് കെ.ആര് മനോജ്, ചേന്നം പള്ളിപ്പുറം വില്ലേജ് ഓഫീസര് ഡി. ഷെറിന്, ഉദ്യോഗസ്ഥര് തുടങ്ങിയവര് ഒപ്പമുണ്ടായിരുന്നു.