പത്തനംതിട്ട : സമാനതകളില്ലാത്ത കോവിഡ് ചികിത്സകള്ക്ക് മാര്ഗനിര്ദേശവും നേതൃത്വം നല്കി മുന്നില് നിന്ന ദേശീയാരോഗ്യ ദൗത്യം ജില്ലാ പ്രോഗ്രാം മാനേജര് ഡോ.എബി സുഷനെ ഐസിഎംആറില് മാസ്റ്റേഴ്സ് ഓഫ് പബ്ലിക് ഹെല്ത്ത് ഉന്നത പഠനത്തിനായി തെരഞ്ഞെടുത്തു.
അദ്ദേഹത്തിന്റെ ഭാര്യ പ്രമാടം പ്രാഥമികാരോഗ്യ കേന്ദ്രം മെഡിക്കല് ഓഫീസര് ഡോ. അഞ്ജലി കൃഷ്ണയ്ക്കും ഇതേ കോഴ്സില് പ്രവേശനം ലഭിച്ചു. ഇവരെക്കൂടാതെ കാസര്ഗോഡ് എന്എച്ച്എം ജില്ലാ മാനേജര് ഡോ.രാമന് സ്വാതി വാമനാണ് ഐസിഎംആര് പഠനത്തിനു കേരളത്തില് നിന്നു തെരഞ്ഞെടുക്കപ്പെട്ട മൂന്നാമത്തെയാള്. സാംക്രമികരോഗങ്ങളെ സംബന്ധിച്ച തുടര് പഠനം ആരോഗ്യവകുപ്പിന്റെ ശമ്പളത്തോടു കൂടി തന്നെയാണ്.
2020 മാര്ച്ച് മുതല് ജില്ലയിലെ കോവിഡ് പ്രതിരോധ പ്രവര്ത്തനങ്ങളില് അഹോരാത്രം പണിയെടുത്ത് അഭിമാനകരവും മാതൃകാപരവുമായ നേട്ടങ്ങള്ക്കുടമയാണ് ഡോ.എബി സുഷന്. സമാനതകളില്ലാത്ത കോവിഡ് കാലത്തെ ആരോഗ്യവകുപ്പിന്റെ കൂട്ടായ പ്രവര്ത്തനങ്ങള്ക്കും ജില്ലാ ഭരണകൂടവുമായി ചേര്ന്നുള്ള ഏകോപനങ്ങള്ക്കും ചുക്കാന് പിടിച്ചത് ഡോ.എബി സുഷനാണ്.
2020 മാര്ച്ച് എട്ടിന് ജില്ലയില് ആദ്യ കോവിഡ് കേസുകള് റിപ്പോര്ട്ട് ചെയ്തതു മുതല് പ്രത്യേകമായ ടീമിനെ സജ്ജമാക്കി പ്രവര്ത്തനങ്ങള് ഏകോപിപ്പിച്ചതും റൂട്ട് മാപ്പിംഗ്, സമ്പര്ക്കപ്പട്ടിക തയ്യാറാക്കല്, പരിശോധനകള് തുടങ്ങി മറ്റൊരു ഘട്ടത്തില് ടിപിആര് അടിസ്ഥാനത്തില് നിയന്ത്രണം വേണ്ടിവന്നപ്പോഴുമെല്ലാം ഡോ.എബി സുഷന് നടത്തിയ ഇടപെടലുകളും നേതൃത്വവും പ്രവര്ത്തനങ്ങളില് മാതൃകാപരമായി.
ഐസിഎംആര് കഴിഞ്ഞ ഫെബ്രുവരിയില് നടത്തിയ പരീക്ഷയുടെയും ഇന്റര്വ്യൂവിന്റെയും അടിസ്ഥാനത്തിലാണ് ചെന്നൈ കേന്ദ്രമാക്കിയ ഇന്സ്റ്റിറ്റ്യൂട്ട് ഓഫ് എപ്പിഡെമോളജിയില് കേരളത്തില് നിന്നു മൂന്നുപേര്ക്ക് ഉന്നത പഠനത്തിന് അവസരം ലഭിച്ചത്.
വള്ളിക്കോട് കുരുമ്പേലില് പി.ജി. പുരുഷോത്തമന്റെയും കെ.കെ. സുലേഖയുടെയും മകനാണ് ഡോ.എബി സുഷന്. 2014ല് ആരോഗ്യവകുപ്പില് ചിറ്റാര് മെഡിക്കല് ഓഫീസറായി ജോലി ആരംഭിച്ച ഡോ.എബി സുഷന് 2016 ജൂലൈ മുതല് എന്എച്ച്എം ഡിപിഎം ആയി, ഇതോടൊപ്പം സംസ്ഥാന ഡേറ്റാ മാനേജര്, അര്ബന് ഹെല്ത്ത് മാനേജര് തസ്തികയിലും ജോലി ചെയ്തു.
ഡോ.അഞ്ജലി കൃഷ്ണ കൊല്ലം മുഖത്തല സ്വദേശിയാണ്. 2014ല് ആനിക്കാട് പ്രാഥമികാരോഗ്യ കേന്ദ്രം മെഡിക്കല് ഓഫീസറായി ആരോഗ്യവകുപ്പില് ജോലിയില് പ്രവേശിച്ചു. തിരുവനന്തപുരം മെഡിക്കല് കോളജില് നിന്നാണ് ഇരുവരും എംബിബിഎസ് പഠനം ഒരേ കാലയളവില് പൂര്ത്തീകരിച്ചത്.
സാംക്രമിക രോഗങ്ങള് വര്ധിച്ചുവരുന്ന കാലഘട്ടത്തില് കേരളത്തില് നിന്ന് ഈ മേഖലയില് വൈദഗ്ധ്യം തെളിയിച്ച മൂന്ന് ഡോക്ടര്മാരെയാണ് ഇത്തവണ ഐസിഎംആര് ഉന്നതപഠനത്തിനു കണ്ടെത്തിയിരിക്കുന്നതെന്നതും ശ്രദ്ധേയമാണ്.