റാന്നി: അങ്ങാടി വരവൂരിൽ തെരുവ് നായകളുടെ ആക്രമണത്തിൽ പരിക്കേറ്റ ആട് ചത്തു. വരവൂർ ചേലക്കാട്ടുതടം മംഗലത്തുകുളത്തിൽ സുജ സ്റ്റീഫന്റെ മൂന്ന് ആടുകളെയാണ് എഴോളം നായകൾ ആക്രമിച്ചത്. ഗുരുതരമായി പരിക്കേറ്റ ആടാണ് ചത്തത്. ഇട്ടിച്ചുവട് ആശുപത്രിയിൽ നിന്ന് ഡോക്ടർ എത്തി പരിശോധന നടത്തി കുത്തി വെപ്പ് എടുത്തിരുന്നു. പേ വിഷബാധയേറ്റാണോ മരിച്ചതെന്ന് വ്യക്തമല്ല. കഴുത്തിന് മുറിവേറ്റിരുന്നു.
തിങ്കളാഴ്ച ഉച്ചകഴിഞ്ഞ് മൂന്ന് മണിയോടെ വീടിനു സമീപമുള്ള തോട്ടത്തിൽ തീറ്റാൻ വിട്ടതായിരുന്നു. നാല് ആടുകളിൽ മൂന്നെണ്ണത്തിന് കടിയേറ്റു. ഒരേണ്ണത്തിന്റെ തൊലി കടിച്ച് ഉരിച്ചെടുത്ത നിലയിലായിരുന്നു. കടയിൽ പോകാൻ ഇറങ്ങിയ അയൽവാസിയായ പെൺകുട്ടിയാണ് നായക്കൾ അക്രമിച്ച വിവരം അറിയിച്ചത്. ആദ്യം ഇതിനെ ഓടിക്കാൻ ശ്രമിച്ചെങ്കിലും വിജയിച്ചില്ല. രണ്ട് ആടിന് ഒരു വയസ്സും മറ്റൊരെണ്ണത്തിന് രണ്ട് വയസ്സുമാണ്.
