ഒറ്റപ്പാലം : തീവണ്ടിയിൽ വാതിലിനടുത്ത് നിന്നോ വാതിൽപ്പടിയിലിരുന്നോ ആണോ യാത്ര, ഒപ്പം മൊബൈലിൽ മുഴുകിയിരിക്കുമെങ്കിൽ സൂക്ഷിക്കണം. അപകടം ആ വാതിൽപ്പടിയിൽ തന്നെയുണ്ട്. പാലക്കാട് റെയിൽവേ ഡിവിഷനിൽ തീവണ്ടിയിൽനിന്ന് തെറിച്ചുവീണ് മരിക്കുന്നവരുടെ എണ്ണം കൂടുന്നു. 2023-ൽ 40 പേരാണ് ഓടുന്ന തീവണ്ടിയിൽനിന്ന് തെറിച്ചുവീണ് മരിച്ചത്. ഇതിൽ ഭൂരിഭാഗം പേരും വാതിൽപ്പടിയിൽ ഇരുന്ന് യാത്ര ചെയ്തപ്പോഴോ വാതിലിനടുത്ത് നിന്ന് യാത്രചെയ്തപ്പോഴോ പുറത്തേക്ക് തെറിച്ചുവീണ് മരിച്ചവരാണ്.
കഴിഞ്ഞദിവസം പാലക്കാട്-ഷൊർണൂർ പാതയിൽ ചോറോട്ടൂരിൽ അന്യസംസ്ഥാനത്തുനിന്നെന്നു സംശയിക്കുന്ന രണ്ടുപേരെ റെയിൽപ്പാളത്തിൽ മരിച്ചനിലയിൽ കണ്ടെത്തിയിരുന്നു. ഇവർ തീവണ്ടിയുടെ വാതിൽപ്പടിയിൽനിന്നാണ് തെറിച്ചുവീണതെന്നാണ് പോലീസും ആർ.പി.എഫും സംശയിക്കുന്നത്.
