പത്തനംതിട്ട : സാമൂഹിക പ്രവർത്തക ഡോ. എം.എസ്. സുനിൽ ഭവനരഹിതരായ സുരക്ഷിതമല്ലാത്ത സാഹചര്യങ്ങളിൽ കഴിയുന്ന നിരാലമ്പർക്ക് പണിത് നൽകുന്ന 365- മത് സ്നേഹഭവനം ജോണിന്റെയും നിതയുടെയും സഹായത്താൽ കൊടുമൺ കിഴക്ക് ഉടയൻ മുരുപ്പേൽ ബിനുവിനും കുടുംബത്തിനും ആയി പൂർത്തീകരിച്ച് നൽകി. വീടിൻറെ ഉദ്ഘാടനവും താക്കോൽ ദാനവും ഡോ. എം. എസ്. സുനിൽ നിർവഹിച്ചു. വർഷങ്ങൾക്ക് മുമ്പ് നിർധനനായ തൻറെ സുഹൃത്തിന് മനുഷ്യ സ്നേഹിയായ ബിനു ഒരു കിഡ്നി ദാനം ചെയ്യുകയും വിവിധ പ്രശ്നങ്ങളാൽ സ്വന്തമായി വീട് പൂർത്തീകരിക്കാൻ കഴിയാതെ പാതിവഴിയിൽ ഉപേക്ഷിച്ച നിലയിൽ കുട്ടികളുമായി സുരക്ഷിതമല്ലാത്ത ഒരു കുടിലിൽ ആയിരുന്നു ഇവർ താമസിച്ചിരുന്നത്.
മാതാവും കിടപ്പ് രോഗിയായ പിതാവും വിദ്യാർഥികളായ രണ്ട് ആൺകുട്ടികളും അടങ്ങുന്ന ഇവരുടെ ജീവിതം നേരിൽ കണ്ട് മനസ്സിലാക്കിയ ടീച്ചർ ഇവർക്കായി രണ്ട് മുറികളും അടുക്കളയും ഹാളും ശുചിമുറിയും വരാന്തയും അടങ്ങിയ വീട് പൂർത്തീകരിച്ച് നൽകുകയായിരുന്നു. ചടങ്ങിൽ വാർഡ് മെമ്പർ അജികുമാർ, പ്രോജക്ട് കോഡിനേറ്റർ കെ.പി. ജയലാൽ എന്നിവർ പ്രസംഗിച്ചു.
