ഓമല്ലൂര് : കാലങ്ങളായി വെള്ളക്കെട്ട് ഭീഷണി നിലനിന്നിരുന്ന ഓമല്ലൂര് ഗ്രാമപഞ്ചായത്തിലെ പുത്തന്പീടിക ഷട്ടര് ജംഗ്ഷനില് മണ്ണും മാലിന്യങ്ങളും നിറഞ്ഞ ഓടകള് വൃത്തിയാക്കിയതോടെ പ്രശ്നത്തിന് പരിഹാരമായി. വര്ഷങ്ങളായി മണ്ണും മാലിന്യങ്ങളും അടിഞ്ഞുകൂടിയ ഓട പൂര്ണ്ണമായും അടഞ്ഞ് കിടന്നിരുന്നതിനാല് ഈ ഭാഗത്ത് ചെറിയ മഴ പെയ്താല് പോലും അത് വലിയ വെള്ളക്കെട്ടിന് കാരണമായി മാറിയിരുന്നു. ജനങ്ങളുടെ ബുദ്ധിമുട്ട് കണക്കിലെടുത്ത് ഓടയിലെ മാലിന്യങ്ങള് നീക്കം ചെയ്യുവാന് പഞ്ചായത്ത് ഭരണ സമിതി പൊതുമരാമത്ത് വകുപ്പിന് പ്രത്യേക നിര്ദ്ദേശം നല്കിയിരുന്നു.
ഇതിന്റെ അടിസ്ഥാനത്തില് പി.ഡബ്ല്യു.ഡി ഉദ്യോഗസ്ഥരും തൊഴിലാളികളും നാട്ടുകാരും ചേര്ന്ന് ഓടകള് വൃത്തിയാക്കുകയായിരുന്നു. പ്രദേശത്തെ നിരവധി വ്യാപാര സ്ഥാപനങ്ങളിലെയും വീടുകളിലെയും പ്ലാസ്റ്റിക് മാലിന്യങ്ങളടക്കം ഈ ഓടയിലേക്കായിരുന്നു ഒഴുക്കിയിരുന്നത്. ഇനിയും ഇത്തരം പ്രവര്ത്തികളില് കൂടി ഓട അടയുന്ന സാഹചര്യം സൃഷ്ടിക്കരുതെന്ന് ഓമല്ലൂര് ഗ്രാമ പഞ്ചായത്ത് പ്രസിഡന്റ് ആതിര വിജയകുമാര് അഭ്യര്ഥിച്ചു.
