കോന്നി : ജില്ലയിലുണ്ടായ മണ്ണിടിച്ചിലില് ഏറ്റവും കൂടുതല് നാശനഷ്ടം നേരിട്ട കോന്നിയില് സഹായം നല്കുന്നതില് സംസ്ഥാന സര്ക്കാര് പരാജയപ്പെട്ടുവെന്ന് കോന്നി എം.എല്.എ അഡ്വ.കെ.യു ജനീഷ് കുമാര് പറഞ്ഞു. ഈ മഴക്കെടുതിയില് കോന്നി നിയമസഭാ മണ്ഡലത്തില് വ്യാപകമായ നാശനഷ്ടങ്ങള് സംഭവിച്ചു. ഒരു ഭാഗത്ത് മണ്ണിടിച്ചിലും മറുഭാഗത്ത് ഉരുള്പൊട്ടലും വെള്ളക്കെട്ടും ഉള്പ്പെടെ ഒട്ടേറെ നാശനഷ്ടങ്ങള് സംഭവിച്ചു. കൃഷി ഏറ്റവും കൂടുതല് നശിച്ചത് കോന്നിയിലാണ്. കണക്കെടുക്കാന് കഴിയാത്ത രീതിയിലാണ് കൃഷി നാശമുണ്ടായത്.
ആ കര്ഷകരെ സഹായിക്കുവാനോ ദുരിത ബാധിതരെ സഹായിക്കുവാനോ സര്ക്കാര് ഒരു നടപടിയും സ്വീകരിക്കാത്തത് ഖേദകരമാണ്. റാന്നിയിലും ആറന്മുളയിലുമൊക്കെ വെള്ളം കയറി. അവിടെയുണ്ടായത്തില് കൂടുതല് നാശവും നഷ്ടവും നേരിട്ടത് കോന്നിയിലാണ്. സംസ്ഥാനത്ത് 52 വീടുകള് ദുരന്തത്തില് പൂര്ണ്ണമായി നശിച്ചു എന്ന് പറയുന്നതില് എട്ടോളം വീടുകള് പൂര്ണ്ണമായി നശിച്ച സ്ഥലമാണ് കോന്നി. ഇവര്ക്കെല്ലാം സഹായം നല്കുന്നതില് സംസ്ഥാന സര്ക്കാര് പൂര്ണ്ണ പരാജയമായിരുന്നു എന്നും അഡ്വ.കെ.യു ജനീഷ് കുമാര് എം.എല്.എ പറഞ്ഞു.
