റാന്നി : പുതിയ ടാറിംങ്ങ് നടന്ന ഭാഗത്തും കുടിവെള്ള വിതരണ പൈപ്പ് പൊട്ടിയതോടെ റോഡിന്റെ ഗുണനിലവാരത്തില് ആശങ്കയേറുന്നു. പുനലൂര്-മൂവാറ്റുപുഴ സംസ്ഥാന പാതയുടെ ഒന്നാംഘട്ട ടാറിംങ് പൂര്ത്തിയായ പെരുമ്പുഴയിലാണ് കുടിവെള്ള വിതരണ പൈപ്പു പൊട്ടിയത്. ഈ മേഖലയില് ടാറിംങ്ങിനു മുമ്പ് പഴയ പൈപ്പുകള് മാറ്റി പുതിയത് സ്ഥാപിച്ചിരുന്നു. ഇത്തരത്തില് മാറ്റിയ പൈപ്പിനും തകരാര് സംഭവിച്ചതോടെ റോഡിന്റെ ഭാവി എങ്ങനെയാകുമെന്നാണ് നാട്ടുകാര്ക്ക് ആശങ്കയേറിയത്.
റോഡ് വീതി കൂട്ടിയപ്പോള് പഴയ പൈപ്പുകള് പലതും പാതയുടെ മധ്യത്തിലായിരുന്നു. ഇതോടെ റാന്നി മേജര് കുടിവെള്ള വിതരണ പൈപ്പുകള് റോഡിന് വശത്തേക്ക് മാറ്റി സ്ഥാപിച്ചിരുന്നു. ഇതും ഇപ്പോള് വ്യാപകമായി പൊട്ടുകയാണ്. പെരുമ്പുഴയ്ക്കും റാന്നി പഞ്ചായത്ത് ഓഫീസിനും ഇടയ്ക്കുള്ള വീടുകണക്ഷന്റെ പൈപ്പാണ് പൊട്ടിയിരിക്കുന്നത്. കൂറ്റന് ടാറിംങ് യന്ത്രങ്ങളുപയോഗിച്ച് നിര്മ്മാണം നടത്തിയതിന് പിന്നാലെയാണ് പൈപ്പിനും തകരാര് സംഭവിച്ചത്. ഇതോടെ ഗുണനിലവാരമില്ലാത്ത പൈപ്പുകളാണ് കരാറുകാര് സ്ഥാപിച്ചതെന്നും ആക്ഷേപമുയരുന്നുണ്ട്.
