തിരുവനന്തപുരം: തിരുവനന്തപുരത്ത് ലഹരിമാഫിയയുടെ ആക്രമണം. ലഹരിമാഫിയ വീട് അടിച്ചുതകര്ത്തശേഷം വീട്ടുകാരെ ആക്രമിച്ചതായാണ് പരാതി. കണ്ടല സ്റ്റേഡിയത്തിനു സമീപം റഹിമിന്റെ വീട്ടില് ബുധനാഴ്ച ഉച്ചയോടെയാണ് ആക്രമണം നടന്നത്. സംഭവത്തില് വീട്ടുടമ റഹീം (40) ന് ആക്രമണത്തില് പരിക്കേറ്റു.
ഉച്ചഭക്ഷണം കഴിച്ചുകൊണ്ടിരിക്കെ രണ്ട് ബൈക്കുകളില് എത്തിയ നാലംഗ സംഘം വീടിന്റെ ഗേറ്റിന് മുന്നിലെത്തി വീട്ടില് ആളുണ്ടോ എന്ന് ചോദിച്ച ശേഷം ഗേറ്റ് വെട്ടിപ്പൊളിക്കാന് ശ്രമിക്കുകയായിരുന്നു. ഗേറ്റ് വെട്ടിപ്പൊളിക്കുന്നതിന്റെ ശബ്ദം കേട്ട് പുറത്തിറങ്ങിയപ്പോള് ആയിരുന്നു റഹീമിനെ ആക്രമിച്ചത്. ശേഷം സംഘം വീട്ടില് കയറി ഭീകരാന്തരീക്ഷം സൃഷ്ടിക്കുകയായിരുന്നു. ജനലും സ്കൂട്ടറും കണ്ണില് കണ്ടതെല്ലാം ഈ സംഘം നശിപ്പിച്ചു. തടയാന് ശ്രമിച്ച റഹീമിനെ ആക്രമിക്കുകയായിരുന്നു. തലക്ക് പരിക്കേറ്റ റഹീം ആശുപത്രിയില് ചികിത്സ തേടി. അക്രമിസംഘത്തെ സംബന്ധിച്ച് പോലീസിന് വിവരം ലഭിച്ചിട്ടുണ്ട്.
