കൊച്ചി : കുട്ടമശേരിയിലെ ആക്രിക്കടയില് പോലീസ് നടത്തിയ പരിശോധനയില് 14 ഗ്രാം എം.ഡി.എം.എ, 400 ഗ്രാം കഞ്ചാവ്, എയര് പിസ്റ്റള്, മയക്കുമരുന്ന് തൂക്കാന് ഉപയോഗിക്കുന്ന മൂന്ന് ഡിജിറ്റല് ത്രാസ്, പൊതിയാനുളള പേപ്പറുകള് എന്നിവ കണ്ടെടുത്തു. ശ്രീമൂലനഗരം തൈക്കാവ് കണിയാംകുടി അജ്നാസിന്റെ ഉടമസ്ഥതയിലുള്ളതാണ് ആക്രിക്കട. കഴിഞ്ഞ ദിവസം ഇയാളേയും, ചൊവ്വര തെറ്റാലി പത്തായപ്പുരയ്ക്കല് വീട്ടില് സുഫിയാന്, കാഞ്ഞിരക്കാട് തരകു പീടികയില് അജ്മല് അലി എന്നിവരെ, 11.200 ഗ്രാം എംഡിഎംഎ, 8.6 കിലോഗ്രാം കഞ്ചാവ് എന്നിവയുമായി മാറമ്ബിള്ളി പാലത്തിന് സമീപത്തു നിന്നും കാലടി പോലീസ് പിടികൂടിയിരുന്നു.
കാറില് കടത്തുമ്പോഴാണ് പിടികൂടിയത്. തുടര്ന്ന് ജില്ലാ പോലീസ് മേധാവി കെ.കാര്ത്തിക്കിന്റെ നേതൃത്വത്തില് പ്രത്യേക ടീം രൂപീകരിച്ച് നടത്തിയ അന്വേഷണത്തിലാണ്, ആക്രിക്കടയില് നിന്നും മയക്കുമരുന്ന് കണ്ടെത്തിയത്. ആക്രിക്കടയുടെ മറവില് ലഹരിമരുന്നു വില്പ്പനയാണ് നടത്തിയിരുന്നത്. യുവാക്കള്ക്കായിരുന്നു ലഹരിമരുന്നുകള് വിറ്റിരുന്നത്. പെരുമ്പാവൂര് എ.എസ്.പി അനുജ് പലിവാല്, ഐപിഎസ് ട്രെയ്നി അരുണ്, കെ.പവിത്രന്, കോട്ടപ്പടി എസ്എച്ച്ഒ എം.ശ്രീകുമാര്, കാലടി എസ്ഐ ടി.ബി വിപിന്, ജയിംസ്, സിപിഒ രണ്ജിത്ത് തുടങ്ങിയവര് ചേര്ന്നാണ് പിടികൂടിയത്. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു. കൂടുതല് അന്വേഷണങ്ങള്ക്കായി ഇവരെ കസ്റ്റഡിയില് വാങ്ങും.
