കൊച്ചി : തൃക്കോണത്തറയിലെ ഒരു ത്രീ സ്റ്റാർ ഹോട്ടലിൽ നിന്ന് 17 ഗ്രാം എംഡിഎംഎയുമായി മൂന്ന് യുവാക്കളെ പോലീസ് പിടികൂടി. കൊച്ചി ഡാൻസാഫ് യൂണിറ്റ് എസ്ഐ വിനോജിന്റെ നേതൃത്വത്തിലുള്ള സംഘമാണ് ഇന്നലെ രാത്രി പരിശോധന നടത്തിയത്. ഉനൈസ്, റോനിഷ്, അക്വിൻ എന്നിവരാണ് പിടിയിലായവർ. പിടിയിലായ മൂവരും നേരത്തെയും ലഹരി കേസുകളിൽ പ്രതികളായവരാണെന്നും ഇവർ ജയിലിൽ വെച്ചാണ് പരസ്പരം പരിചയപ്പെട്ടതെന്നും പോലീസ് അറിയിച്ചു. കൊച്ചി നഗരത്തിന്റെ വിവിധ ഭാഗങ്ങളിൽ വ്യാപകമായി ലഹരിമരുന്ന് എത്തിച്ച് വിൽപന നടത്തുന്ന സംഘത്തിലെ പ്രധാനികളാണ് ഇവരെന്നാണ് പോലീസിന്റെ പ്രാഥമിക വിലയിരുത്തൽ.
ഹോട്ടലിൽ മുറിയെടുത്ത് അവിടെ കേന്ദ്രീകരിച്ചായിരുന്നു ഇവരുടെ ഇടപാടുകൾ നടന്നിരുന്നത്. പ്രതികളെ നിലവിൽ ഹിൽ പാലസ് പോലീസ് സ്റ്റേഷനിൽ എത്തിച്ചിട്ടുണ്ട്. ഇവരെ ഇന്ന് കോടതിയിൽ ഹാജരാക്കി റിമാൻഡ് ചെയ്യാനുള്ള നടപടികൾ പുരോഗമിക്കുകയാണ്. കൂടുതൽ ലഹരി ഇടപാടുകാരെ കണ്ടെത്തുന്നതിനായി ഇവരെ പിന്നീട് കസ്റ്റഡിയിൽ വാങ്ങി ചോദ്യം ചെയ്യുമെന്നും പോലീസ് വ്യക്തമാക്കി.
