ലഖ്നൗ : ഉത്തർപ്രദേശിലെ മഹാരാജ്ഗഞ്ച് ജില്ലയിൽ മദ്യലഹരിയിൽ യുവാവ് വലിഞ്ഞുകയറിയത് 11,000 വോൾട്ടിന്റെ ഹൈ വോൾട്ടേജ് വൈദ്യുതി പോസ്റ്റിൽ. അസാധാരണമായ ഈ കാഴ്ച പെട്ടെന്ന് തന്നെ പ്രദേശത്തെ സംസാരവിഷയമായി മാറി. സംഭവത്തിന്റെ ദൃശ്യങ്ങളടക്കം വൈറലാണ്. ദീൻ ദയാൽ എന്ന യുവാവാണ് ഈ സാഹസം കാണിച്ചത്. മണിക്കൂറുകളോളം ഇയാൾ ഉയർന്ന വോൾട്ടേജ് ലൈനിൽ കുടുങ്ങി കിടന്നു. പർസ ഖുർദ് ഗ്രാമത്തിലെ നിവാസിയാണ് ദീൻ ദയാൽ. മദ്യപിച്ച് ബോധമില്ലാതെയാണ് യുവാവ് ഇങ്ങനെ ചെയ്തത്. വൈദ്യുതി ലൈനുകൾക്ക് മുകളിൽ കിടന്നത് നാട്ടുകാരെയും പൊലീസിനെയും മണിക്കൂറുകളോളം ആശങ്കയിലാഴ്ത്തി. ദയാൽ വൈദ്യുതി പോസ്റ്റിൽ കയറുന്നത് ആരും കണ്ടിരുന്നില്ല.
സംഭവത്തിന്റെ വാർത്ത പരന്നതോടെ ജനക്കൂട്ടം തടിച്ചുകൂടുകയും ലൈനുകൾക്ക് മുകളിൽ യുവാവ് കിടക്കുന്നത് കണ്ട് പരിഭ്രാന്തരായ നാട്ടുകാർ ഉടൻ തന്നെ വിവരം പോലീസിനെയും വൈദ്യുതി വകുപ്പിനെയും അറിയിക്കുകയായിരുന്നു.
