തിരുവനന്തപുരം: മദ്യപിച്ച് ലക്കുകെട്ട് മധ്യവയസ്കൻ ഇരുപ്പുറപ്പിച്ചത് പിങ്ക് പോലീസിന്റെ വാഹനത്തിന് മുകളിൽ. നെയ്യാറ്റിൻകരയിലായിരുന്നു സംഭവം. നെയ്യാറ്റിൻകര ബസ് സ്റ്റാൻഡിങ് സമീപത്ത് നിർത്തിയിട്ടിരുന്ന പിങ്ക് പോലീസിന്റെ വാഹനത്തിന് മുകളിലാണ് മദ്യപൻ അരമണിക്കൂറോളം കയറിയിരുന്ന് അഭ്യാസം നടത്തിയത്. തുടർന്ന് പോലീസ് ഉദ്യോഗസ്ഥരെത്തി ഇയാളെ ഇറക്കിവിടുകയായിരുന്നു. ഡ്യൂട്ടിയിൽ ഉണ്ടായിരുന്ന പോലീസുകാർ വാഹനം നിർത്തി പുറത്തേക്ക് ഇറങ്ങിയ സമയത്താണ് മദ്യപന്റെ അഭ്യാസപ്രകടനം. മദ്യലഹരിയിലായിരുന്ന ഇയാൾ ആദ്യം വാഹനത്തിൽ ചാരിനിൽക്കുകയും പിന്നീട് വാഹനത്തിൽ പുറത്തു കയറി ഇരിക്കുകയുമായിരുന്നു. ധാരാളം പേർ സംഭവം കണ്ടെങ്കിലും തടയാൻ ശ്രമിച്ചാൽ ഒരുപക്ഷെ അയാൾ തങ്ങൾക്ക് നേരെ വന്നേക്കാമെന്ന് ഭയന്ന് ആരും അതിന് മുതിർന്നില്ല.
തുടർന്ന് പോലീസ് ഉദ്യോഗസ്ഥർ തിരികെ എത്തിയപ്പോഴാണ് മദ്യപനെ കാണുന്നതും, അയാളെ താഴെയിറക്കി വിട്ടതും. സംഭവത്തിന്റെ ദൃശ്യങ്ങളും പുറത്തുവന്നിട്ടുണ്ട്. ഇത് സോഷ്യൽ മീഡിയയിൽ വ്യാപകമായി പ്രചരിച്ചതോടെ മദ്യപനെ കണ്ടെത്തി കൂടുതൽ നടപടികളിലേക്ക് നീങ്ങാനുള്ള നീക്കത്തിലാണ് നെയ്യാറ്റിൻകര പോലീസ്.
