ദില്ലി: വിദ്യാര്ത്ഥിനികള്ക്ക് നേരെ അതിക്രമം. ജെഎന്യു ക്യാംപസില് കാറിലെത്തിയവര് രണ്ട് വിദ്യാര്ത്ഥിനികളെ തട്ടിക്കൊണ്ടുപോകാന് ശ്രമിച്ചു എന്നാണ് പരാതി. ഇവര് മദ്യപിച്ചിരുന്നതായും വിദ്യാര്ത്ഥിനികള് പറഞ്ഞു. ചൊവ്വാഴ്ച രാത്രി പെണ്കുട്ടികള് കാമ്പസിനുള്ളില് നടക്കാനിറങ്ങിയപ്പോഴായിരുന്നു സംഭവം. പുറത്തു നിന്ന് ആളുകള്ക്ക് വാഹനത്തില് ക്യാംപസിനകത്ത് പ്രവേശിക്കാനും തടസ്സങ്ങളില്ല. ഈ സാഹചര്യത്തിലാണ് ഇന്നലെ രാത്രി പെണ്കുട്ടികള് നടക്കുന്നതിനിടെ മദ്യപിച്ചെത്തിയ ആളുകള് പെണ്കുട്ടികളുടെ മുന്നില് വാഹനം നിര്ത്തി ഇവരോട് സംസാരിച്ചതിന് ശേഷം ഇവരെ വാഹനത്തിലേക്ക് പിടിച്ചു കയറ്റാന് ശ്രമിച്ചത്.
പെണ്കുട്ടികള് ബഹളം വെച്ചതോടെ മറ്റ് സ്ഥലങ്ങളില് നിന്ന് വിദ്യാര്ത്ഥികള് ഓടിക്കൂടി. മറ്റ് കുട്ടികളെ കാറിലെത്തിയവര് പിടിച്ചു തള്ളാനും മറ്റും ശ്രമിച്ചു. കൂടുതല് വിദ്യാര്ത്ഥികളെത്തിയതോടെ ഇവര് കാര് എടുത്ത് പുറത്തേക്ക് പോകുകയായിരുന്നു. അതേസമയം, പരാതി ലഭിച്ചയുടന് നിയമനടപടി സ്വീകരിച്ചതായി പോലീസ് അറിയിച്ചു.
