പത്തനംതിട്ട : കുമ്പഴ – മൈലപ്ര റോഡരുകില് സ്വകാര്യ വ്യക്തികളുടെ പുരയിടത്തില് നില്ക്കുന്ന മരങ്ങളുടെ ഉണങ്ങിയ ചില്ലകള് സംസ്ഥാന പാതയിലേക്ക് ഒടിഞ്ഞ് വീഴുന്നത് വാഹന യാത്രക്കാര്ക്ക് ഭീഷണിയാകുന്നു. കുമ്പഴ വടക്ക് ഭാഗത്താണ് ഇത്തരത്തില് മരങ്ങള് റോഡിലേക്ക് ചാഞ്ഞു നില്ക്കുന്നത്. കാലങ്ങളായി ഉണങ്ങി നില്ക്കുന്ന മരച്ചില്ലകള് കാറ്റിലും മഴയിലും ഒടിഞ്ഞ് റോഡിലേക്ക് വീഴുന്നത് പതിവാണ്. കഴിഞ്ഞ ദിവസവും ഇത്തരത്തില് മരച്ചില്ലകള് ഒടിഞ്ഞ് റോഡിലേക്ക് വീണിരുന്നു. ഇരുചക്ര വാഹനയാത്രക്കാര്ക്കാണ് ഇത് ഏറ്റവും അപകടകരമാകുന്നത്.
മുകളില് നിന്നും ഒടിഞ്ഞ് വീഴുന്ന കമ്പുകള് അപ്രതീക്ഷിതമായിട്ടാവും വാഹന യാത്രക്കാരുടെ മുകളിലേക്ക് പതിക്കുക. റോഡില് ഒടിഞ്ഞു കിടക്കുന്ന മരച്ചില്ലകള് ശ്രദ്ധയില് പെടാതെ ഇതില് വാഹനം കയറി അപകടം സംഭവിക്കാനും സാധ്യത കൂടുതലാണ്. നിരവധി സ്കൂള് ബസുകള് സഞ്ചരിക്കുന്ന പ്രധാന പാതയാണ് ഇത്. മഴക്കാലത്തിന് മുന്പ് തന്നെ അപകടകരമായ ഇത്തരം മരച്ചില്ലകള് മുറിച്ച് മാറ്റേണ്ടതായിരുന്നു. മഹാഗണി അടക്കമുള്ള മരത്തിന്റെ ഉണങ്ങിയ കൊമ്പുകള് റോഡിലേക്ക് ഒടിഞ്ഞ് വീഴുന്ന സംഭവങ്ങള് ഇപ്പോള് പതിവാകുന്നുണ്ട്. എന്നിട്ടും അപകടം നടന്നാലെ നടപടിയെടുക്കു എന്ന വാശിയിലാണ് അധികൃതര്.
