ദുബായ് : ലോകത്തിലെ ഏറ്റവും സുന്ദരമായ കെട്ടിടം എന്ന് വിശേഷിപ്പിക്കുന്ന ദുബായ് മ്യൂസിയം ഓഫ് ദ ഫ്യൂച്ചർ രണ്ടാം വാർഷിക നിറവിൽ. ഭാവിലോകത്തെ കാഴ്ചകൾകാണാനായി ഇതുവരെ 172-ലേറെ രാജ്യങ്ങളിൽനിന്ന് 20 ലക്ഷത്തിലേറെ സന്ദർശകരെത്തി. ഇതിൽ 40-ലേറെ രാഷ്ട്രനേതാക്കളും മാധ്യമ പ്രതിനിധി സംഘങ്ങളും ഉൾപ്പെടുന്നു.
280-ലേറെ പ്രധാന പരിപാടികൾക്കും ആതിഥേയത്വം വഹിച്ചു. യു.എ.ഇ. വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ കാഴ്ചപ്പാടിന് അനുസൃതമായി ഭാവിസാങ്കേതികവിദ്യകൾ പര്യവേക്ഷണം ചെയ്യുന്നതിനാണ് ദുബായ് മ്യൂസിയം ഓഫ് ദ ഫ്യൂച്ചർ തുറന്നത്.
