പത്തനംതിട്ട : തമിഴ്നാട്, ആന്ധ്രാപ്രദേശ് സംസ്ഥാനങ്ങളിലെ കാലാവസ്ഥാ വ്യതിയാനം മൂലം താറാവ് മുട്ട ഉത്പാദനം കുറഞ്ഞതോടെ പത്തനംതിട്ട ജില്ലയിലെ വ്യാപാര സ്ഥാപനങ്ങളില് താറാവ് മുട്ടയുടെ ലഭ്യത കുറഞ്ഞു. ജില്ലയില് കുട്ടനാടന് മേഖലകളില് നിന്നും അപ്പര് കുട്ടനാടന് മേഖലയില് നിന്നുമാണ് പ്രധാനമായും താറാവ് മുട്ട ലഭിച്ചിരുന്നത്. എന്നാല് ജില്ലയിലെ വ്യാപാര സ്ഥാപനങ്ങളില് മുഴുവനും വിതരണം ചെയ്യുവാന് ആവശ്യമായ താറാവ് മുട്ട ഇവിടെ ഉത്പാദിപ്പിക്കപ്പെടുന്നില്ല. ഇതിനാല് ഇതര സംസ്ഥാനങ്ങളെ ആശ്രയിച്ചാണ് ജില്ലയില് താറാവ് മുട്ടയുടെ വ്യാപാരം നടക്കുന്നത്. തമിഴ്നാട്ടിലും ആന്ധ്രപ്രദേശിലും ചൂട് വര്ധിച്ചതിനാല് താറാവുകള്ക്ക് മുട്ടയിടാന് അനുകൂലമായ സാഹചര്യമില്ലാത്തതാണ് ഇപ്പോള് തിരിച്ചടിയായത്.
പത്തനംതിട്ട ജില്ലയിലെ നിരണം, കടപ്ര ഭാഗങ്ങളില് നിന്നുമാണ് താറാവ് മുട്ട കൂടുതലും ലഭിക്കുന്നത്. ആലപ്പുഴ, കോട്ടയം ജില്ലകളിലെ കുട്ടനാടന് പാടശേഖരങ്ങളില് നിന്നും ജില്ലയുടെ വിവിധ ഭാഗത്തേക്ക് വിതരണം ചെയ്യാന് ആവശ്യമായ മുട്ടകള് ലഭിച്ചിരുന്നു. സ്വന്തമായി ഹാച്ചറികളുള്ള മൊത്ത കച്ചവടക്കാരാണ് താറാവ് മുട്ട വിതരണം ചെയ്യുന്നതില് വിപണിയില് പിടിച്ചു നില്ക്കുന്നത്. ജില്ലയില് താറാവ് മുട്ടക്ക് ഉണ്ടായ ക്ഷാമം നിലവില് തുടര്ന്നാല് ഹോട്ടലുകളിലും തട്ടുകടകളിലും താറാവ് മുട്ട വിഭവങ്ങള് ലഭ്യമാകാത്ത സാഹചര്യം ഉടലെടുക്കുമെന്ന ആശങ്കയും നിലവിലുണ്ട്.
