റാന്നി : വെള്ളം കയറി നശിച്ച റാന്നിയിലെ മൊബൈല് ഫോണ് കടകളില് നിന്നും മൊബൈല് ഫോണുകളും കവറുകളും ഉള്പ്പെടെ ഇതര സംസ്ഥാന തൊഴിലാളികള് മോഷ്ടിച്ച് കൊണ്ടുപോയി. കഴിഞ്ഞ ദിവസങ്ങളില് പെയ്ത കനത്ത മഴയെ തുടര്ന്ന് റാന്നി ഇട്ടിയപ്പാറ ബസ് സ്റ്റാന്റിലടക്കം നിരവധി മൊബൈല് ഫോണ് കടകളില് വെള്ളം കയറി ഒട്ടേറെ നാശനഷ്ടങ്ങള് സംഭവിച്ചിരുന്നു. കടകളില് വെള്ളം കയറിയപ്പോള് വ്യാപാരികള് കടയ്ക്കുള്ളില് നിന്നും പുറത്തേക്ക് എടുത്തിട്ട സാധനങ്ങളാണ് കൂട്ടമായി എത്തിയ ഇതര സംസ്ഥാനക്കാര് തൂത്തുവാരി കൊണ്ടുപോയത്.
തുറന്ന് കിടന്നിരുന്ന പല കടകളുടെയും ഉള്ളില് കയറി ഇവര് സാധനങ്ങള് അപഹരിക്കാന് തുടങ്ങിയതോടെ വ്യാപാരികളും നാട്ടുകാരും പോലീസിനെ അറിയിക്കുകയും തുടര്ന്ന് റാന്നി പോലീസ് സ്ഥലത്തെത്തി ഇവരെ ഓടിച്ച് വിടുകയും ചെയ്തിരുന്നു. എന്നാല് പോലീസ് സ്ഥലത്ത് നിന്നും പോയതിന് തൊട്ടുപിന്നാലെ ഇവര് വീണ്ടും ഇവിടെ എത്തി സാധനങ്ങള് അപഹരിക്കുകയായിരുന്നു. മൊബൈല് ഫോണ് കടകളില് നിന്നും ഇവര് എന്തെല്ലാം കടത്തി കൊണ്ട് പോയി എന്നത് സംബന്ധിച്ച് വ്യാപാരികള് വിവരങ്ങള് ശേഖരിച്ച് വരുന്നതേയുള്ളൂ. ഇതര സംസ്ഥാന തൊഴിലാളികളുടെ ഈ പ്രവര്ത്തി കാരണം ലക്ഷങ്ങളുടെ നഷ്ടമാണ് മൊബൈല് ഫോണ് കടയുടമകള്ക്ക് സംഭവിച്ചത് എന്നാണ് പ്രാഥമിക നിഗമനം. കണക്കെടുപ്പിന് ശേഷം മാത്രമേ കൃത്യമായ നഷ്ടത്തെ കുറിച്ചുള്ള വിവരം ലഭിക്കുകയുള്ളൂ.
