ആലത്തൂര്: ചിറ്റിലഞ്ചേരി കോന്നല്ലൂരില് ഡി.വൈ.എഫ്.ഐ വനിത നേതാവിനെ കഴുത്ത് ഞെരിച്ച് കൊലപ്പെടുത്തിയ കേസില് കീഴടങ്ങിയ അഞ്ചുമൂര്ത്തിമംഗലം ചീകോട് പയ്യകുണ്ടില് സുജീഷിനെ (24) ആലത്തൂര് ഒന്നാം ക്ലാസ് മജിസ്ട്രേറ്റ് കോടതി 15 ദിവസത്തേക്ക് റിമാന്ഡ് ചെയ്തു.കൊന്നല്ലൂരില് ശിവദാസന്റെ മകള് സൂര്യപ്രിയയാണ് (24) കൊല്ലപ്പെട്ടത്. ബുധനാഴ്ച രാവിലെ 11 മണിയോടെയായിരുന്നു സംഭവം. ഡി.വൈ.എഫ്.ഐ ആലത്തൂര് മേഖല കമ്മിറ്റി അംഗവും കൊന്നല്ലൂര് യൂനിറ്റ് സെക്രട്ടറിയുമായിരുന്നു സൂര്യപ്രിയ. കൃത്യത്തിനുശേഷം സുജീഷ് ആലത്തൂര് പോലീസില് കീഴടങ്ങുകയായിരുന്നു.പോലീസ് നടപടികള്ക്കുശേഷം തൃശൂര് മെഡിക്കല് കോളജിലേക്ക് മാറ്റിയ മൃതദേഹം വ്യാഴാഴ്ച പോസ്റ്റ്മോര്ട്ടം നടപടികള് പൂര്ത്തിയാക്കി 2.30ന് കോന്നല്ലൂരിലെ വീട്ടില് പൊതുദര്ശനത്തിന് വെച്ചു. തുടര്ന്ന് തിരുവില്വാമല ഐവര്മഠം ശ്മശാനത്തില് സംസ്കാരം നടത്തി.
