ബീജിങ്: ചൈനയുടെ തെക്കുപടിഞ്ഞാറന് പ്രവിശ്യയായ സിചുവാനിലെ ലുഡിംഗ് കൗണ്ടിയില് ഉണ്ടായ ശക്തമായ ഭൂകമ്പത്തില് മരണസംഖ്യ 46 ആയി ഉയര്ന്നു. അന്പതോളം പേര്ക്ക് ഗുരുതരമായി പരിക്കേറ്റു. റിക്ടര് സ്കെയിലില് 6.8 തീവ്രത രേഖപ്പെടുത്തിയ ഭൂചലനത്തില് മരണസംഖ്യ ഇനിയും ഉയര്ന്നേക്കാമെന്നാണ് റിപ്പോര്ട്ടുകള്. പ്രാദേശിക സമയം ഉച്ചയ്ക്ക് 12:25ഓടെയാണ് മേഖലയില് ഭൂചലനമുണ്ടായത്. മരിച്ചവരില് 29 പേര് ലുഡിംഗ് കൗണ്ടിയിലുള്ളവരും 17 പേര് യാന് സിറ്റിയില് നിന്നുള്ളവരുമാണ്.
പ്രദേശത്ത് ഇപ്പോഴും തുടര്ചലനങ്ങള് അനുഭവപ്പെടുന്നുണ്ടെന്നാണ് റിപ്പോര്ട്ടുകള്. മേഖലയിലെ ജനങ്ങള്ക്ക് അടിസ്ഥാന സൗകര്യങ്ങള് ഉള്പ്പെടെ ലഭ്യമാകുന്നില്ലെന്നും റിപ്പോര്ട്ടുകള് പറയുന്നു. വെള്ളം, വൈദ്യുതി, ഗതാഗതം തുടങ്ങിയ അടിസ്ഥാന സൗകര്യങ്ങളെല്ലാം തകര്ന്നിരിക്കുകയാണ്. ചൈനീസ് പ്രസിഡന്റ് ഷി ജിന്പിങ് ദുരന്തത്തില് അനുശോചനം രേഖപ്പെടുത്തി. അപകടത്തില്പ്പെട്ടവരുടെ ജീവന് രക്ഷിക്കുക എന്നതിന് പ്രഥമ പരിഗണന കൊടുക്കണമെന്ന് ഷി ജിന്പിങ് പറഞ്ഞു.
മേഖലയിലെ രക്ഷാപ്രവര്ത്തനം ഊര്ജ്ജിതമാക്കാനും അദ്ദേഹം ആഹ്വാനം ചെയ്തിട്ടുണ്ട്. അതേസമയം സിചുവാനിലെ ഭൂകമ്പത്തില് തകര്ന്നവര്ക്ക് അനുശോചനം അറിയിക്കുന്നതായി ചൈനയിലെ ഇന്ത്യന് എംബസി ട്വീറ്റ് ചെയ്തു. പരിക്കേറ്റവര് എത്രയും വേഗം സുഖം പ്രാപിക്കട്ടെ എന്നും ട്വീറ്റില് പറയുന്നു.
