പത്തനംതിട്ട : വീടു മാറുമ്പോഴോ വീട്ടില് അറ്റകുറ്റപ്പണി നടത്തുമ്പോഴോ അജൈവ പാഴ്വസ്തു ഏറെയുണ്ടെങ്കില് അവ നേരിട്ട് കൈമാറാന് ക്ലീന് കേരള കമ്പനി സൗകര്യമൊരുക്കുന്നു. വീടുകളിലും സ്ഥാപനങ്ങളിലും പ്രത്യേകസാഹചര്യത്തില് ഉണ്ടാകുന്ന അജൈവ പാഴ്വസ്തുക്കള് ശാസ്ത്രീയമായി സംസ്കരിക്കുന്നുവെന്ന് ഉറപ്പാക്കാനാണ് സംസ്ഥാന ഗവണ്മെന്റിന്റെ നിര്ദേശമനുസരിച്ച് ഇക്കോ ബാങ്കുകള് ജില്ലകളില് സജ്ജീകരിച്ചിരിക്കുന്നത്. പുനഃചംക്രമണം ചെയ്യാന് കഴിയുന്നവയ്ക്കു വില നല്കി വാങ്ങും. പുനഃചംക്രമണ സാധ്യത ഇല്ലാത്തവക്ക് ചെറിയതുക കമ്പനി ഈടാക്കിയുമാണ് ഇക്കോ ബാങ്ക് പ്രവര്ത്തിക്കുന്നത്. പദ്ധതിയുടെ ആദ്യഘട്ടത്തില് എല്ലാ ജില്ലയിലും ഓരോ കേന്ദ്രം വീതമാണ് ഇക്കോ ബാങ്കിന് ക്രമീകരിച്ചിട്ടുള്ളത്. പത്തനംതിട്ട ജില്ലയില് ഓമല്ലൂരിലുള്ള കമ്പനി ഗോഡൗണാണ് ഇക്കോ ബാങ്കായി സജ്ജീകരിച്ചിരിക്കുന്നത്.
അജൈവ പാഴ്വസ്തുക്കള് ചാക്കില് പായ്ക്ക് ചെയ്ത് ഇക്കോബാങ്കില് എത്തിക്കാനാകും. ഭക്ഷണ അവശിഷ്ടം, മെഡിക്കല് മാലിന്യം, സാനിട്ടറി മാലിന്യം, അപകടകരമായ രാസവസ്തുക്കള് നിറച്ച കണ്ടെയ്നറുകള്, ജൈവാംശമുള്ള മാലിന്യങ്ങള് എന്നിവ സ്വീകരിക്കുന്നതല്ല. മറ്റെല്ലാ അജൈവ പാഴ്വസ്തുക്കളും ഇലക്ട്രോണിക് മാലിന്യങ്ങളും സ്വീകരിക്കും. കഴിഞ്ഞ ദിവസം തദ്ദേശ മന്ത്രി എം.ബി. രാജേഷ് തിരുവനന്തപുരം മുട്ടത്തറയില് ഇക്കോ ബാങ്കിന്റെ സംസ്ഥാനതല ഉദ്ഘാടനം നിര്വഹിച്ചു. മാലിന്യമുക്ത നവകേരള കാമ്പെയിന്റെ ഭാഗമായിട്ടാണ് ഇക്കോബാങ്ക് പ്രവര്ത്തനം. അജൈവ മാലിന്യങ്ങളുടെ ശാസ്ത്രീയ സംസ്കരണത്തിന് പുതിയൊരു ചുവടുവയ്പാണ് ഇക്കോ ബാങ്കിലൂടെ ക്ലീന് കേരളാകമ്പനി നടത്തുന്നതെന്ന് ജില്ലാ മാനേജര് എം.ബി. ദിലീപ് കുമാര് പറഞ്ഞു. പത്തനംതിട്ട ജില്ലയിലെ ഇക്കോബാങ്ക് പ്രവര്ത്തനവുമായിബന്ധ പെടാവുന്ന നമ്പര് 7558089933, 04683588776
