ന്യൂഡല്‍ഹി : നാഷണല്‍ ഹെറാള്‍ഡ് കേസില്‍ കര്‍ണാടക കോണ്‍ഗ്രസ് അദ്ധ്യക്ഷന്‍ ഡി കെ ശിവകുമാറിനെയും സഹോദരനെയും ഇ ഡി ചോദ്യം ചെയ്തു. ചോദ്യം ചെയ്യലിന് ഹാജരാകാന്‍ നോട്ടീസ് ലഭിച്ചതനുസരിച്ച് ശിവകുമാര്‍ ഡല്‍ഹിയിലെ ഇ ഡി ആസ്ഥാനത്ത് എത്തുകയായിരുന്നു. യങ് ഇന്ത്യ ലിമിറ്റഡുമായി ഡികെ ശിവകുമാര്‍ നടത്തിയ ഇടപാടുകള്‍ സംബന്ധിച്ചാണ് ചോദ്യം ചെയ്യല്‍.
ഭാരത് ജോഡോ യാത്ര കര്‍ണാടകയിലൂടെ കടന്നു പോകുന്നതിനാല്‍ തീയതി മാറ്റിവെ യ്ക്കാന്‍ ആവശ്യപ്പെട്ടിരുന്നു. പക്ഷേ അന്വേഷണ ഏജന്‍സി ഇത് തള്ളുകയായിരുന്നു. ഇതിനിടയിലാണ് ഇരുവരെയും ഇ ഡി ചോദ്യം ചെയ്യലിന് വിളിച്ചു വരുത്തിയത്. അഞ്ചു മണിക്കൂര്‍ നീണ്ട ചോദ്യം ചെയ്യലിന് ശേഷം ശിവകുമാര്‍ ഇ ഡി ഓഫീസില്‍ നിന്നും മടങ്ങി. യങ് ഇന്ത്യ ലിമിറ്റഡിന് ഇരുവരും സംഭാവന നല്‍കിയ പണത്തിന്‍റെ ഉറവിടത്തെ കുറിച്ചായിരുന്നു ചോദ്യങ്ങള്‍. വഴി വിട്ട് സ്വത്ത് സമ്പാദിച്ചുവെന്ന കേസില്‍ കഴിഞ്ഞ മാസവും ശിവകുമാറിനെ ഇ ഡി ചോദ്യം ചെയ്തിരുന്നു.
